Májilis Tóraǵasy Nurlan Nyǵmatýlın parlamentaralyq yntymaqtastyqty nyǵaıtýdy jáne jahandyq kún tártibindegi ózekti máselelerdi beıbit jolmen sheshý úshin parlamenttik dıplomatıa quraldaryn paıdalanýdy qoldady.

Osy kúnderi Vena qalasynda ótip jatqan parlamentter spıkerleriniń Besinshi Dúnıejúzilik konferensıasy aıasynda Nurlan Nyǵmatýlın eýropalyq jáne azıalyq parlamentshilermen, halyqaralyq parlamenttik uıymdar basshylarymen, sondaı-aq ulttyq delegasıa ókilderimen ekijaqty kezdesýler ótkizdi.

Parlamentaralyq Odaqtyń tóraǵasy Dýarte Pashekomen kezdesý barysynda odan ári ózara is-qımyldyń keleshegi jaıy talqylandy. Sonymen qatar, Májilis Spıkeri qazaqstandyq Parlament ókilderi negizgi quqyqtar men bostandyqtardy saqtaı otyryp, barlyq adamdar úshin teń múmkindikterdi qamtamasyz etetin, áleýmettik ádil jáne qaýipsiz álem paıymyna negizdelgen Parlamentaralyq Odaqtyń qaǵıdattaryn ustanatynyn atap ótti.

Sonymen qatar, kezdesý barysynda Aýǵanstandaǵy jaǵdaıdy turaqtandyrýdyń mańyzdylyǵy týraly da aıtyldy. Nurlan Nyǵmatýlınniń pikirinshe, Parlamentaralyq Odaq parlamenttik dıplomatıa quraldaryn paıdalana otyryp, Aýǵan máselesin retteýde mańyzdy ról atqara alar edi.
​Májilis Spıkeri Parlament ókilderine toleranttylyq pen mádenı san alýandyq ıdeologıasyn ilgeriletý, jahandyq kún tártibindegi ózekti máselelerdi beıbit jolmen sheshýge jáne ymyraǵa kelýge shaqyrý qajet dep esepteıdi.

Májilis Tóraǵasy óziniń ıspandyq áriptesi - Depýtattar kongresiniń Spıkeri Merıchel Batetpen kezdesýde Qazaqstan Prezıdenti Qasym-Jomart Toqaev bastamashy bolǵan saıası reformalarǵa, sondaı-aq áıelder men jastardyń saıası ómirine qatysý múmkindigin keńeıtýge, partıalardyń Parlamentke ótýiniń shekti deńgeıin 7-den 5% - ǵa deıin tómendetýge, saılaý búletenderine «barshaǵa qarsy» baǵanyn engizýge jáne t. b. máselelerge qatysty ózgeristerge nazar aýdardy.

Biz Qazaqstannyń qarqyndy damyp kele jatqanyn jáne demokratıany nyǵaıtý baǵytynda úlken qadamdar jasalyp jatqanyn kórip otyrmyz. Eń aldymen, áıelder men jastardyń rólin kúsheıtýge qatysty saıası reformalar – bul jalpy demokratıany damytý úshin óte mańyzdy, - dedi óz kezeginde Merıchel Batet.
Odan ári Koreıa Respýblıkasy Ulttyq Assambleıasynyń Tóraǵasy Pak Bón Sokpen kezdesý barysynda yntymaqtastyqty nyǵaıtý taqyryby jalǵasyn tapty.

​Taraptar qazaqstandyq jáne koreıalyq Parlament ókilderiniń ózara is-qımylynyń keńeıýi eki memleket basshylarynyń ýaǵdalastyqtaryn iske asyrýǵa yqpal etetinine senim bildirdi. Májilis Spıkeri Nurlan Nyǵmatýlın atap ótkendeı, jaqynda Qazaqstan Prezıdenti Qasym-Jomart Toqaevtyń Seýlge memlekettik sapary eki eldiń saıası dıalogyn damytýǵa jáne strategıalyq seriktestigin keńeıtýge serpin berdi.

Májilis Spıkeri Ázerbaıjan jáne Qyrǵyzstan parlamentteriniń basshylary Sahıba Gafarova jáne Talant Mamytovpen keń aýqymdy máselelerdi talqylady.
Nurlan Nyǵmatýlın Parlament ókilderiniń, sonyń ishinde túrki ınstıtýttary aıasyndaǵy birlesken syndarly jumysy baýyrlas halyqtar men elder arasyndaǵy jan-jaqty ózara is-qımyldy, dostyq pen tatý kórshilikti odan ári nyǵaıtýǵa yqpal etetinine senim bildirdi.

Sonymen qatar, Májilis Tóraǵasy Túrkitildes elder Parlamenttik Assambleıasynyń bıylǵy qyrkúıek aıynyń sońynda Túrkistanda ótkizilýi josparlanǵan X plenarlyq otyrysy aldaǵy yntymaqtastyq úshin jańa perspektıvalyq baǵyttardy ashatynyn atap ótti.
Parlamentter spıkerleriniń Besinshi Dúnıejúzilik konferensıasy aıasynda Nurlan Nyǵmatýlın Belgıa Ókilder Palatasynyń Spıkeri Elıan Tılemen de kelissózder júrgizdi.