Qostanaı oblysynda Reseımen shekarany zańsyz kesip ótpek bolǵan eki aýǵan azamaty ustaldy. Olarǵa Qazaqstan azamaty  kómektesken, dep habarlady óńirlik polısıa departamentiniń baspasóz qyzmeti.

"Materıaldyq syıaqy úshin Aýǵanstannyń eki azamatyn Qostanaı oblysynyń Qarabalyq aýdanyna jetkizip, Reseıge ketýge kómektesken Qazaqstan azamaty ustaldy" dep jazylǵan habarlamada.

Ustalǵan aýǵan azamatynyń bireýinde eshqandaı qujat joq. Sot sheshimimen ol Qostanaı qalasy polısıa basqarmasynyń qabyldaý-bólý ortalyǵyna qamaldy.

Oqıǵa boıynsha qylmystyq kodekstiń 394-baby 1-tarmaǵyna (Zańsyz kóshi-qondy uıymdastyrý) saı boıynsha sotqa deıingi tergeý júrip jatyr. Sheteldikterge kómektesken Qazaqstan azamatyn iri aıyppul, eki jylǵa deıin bas bostandyǵyn shekteý ne sol merzimge abaqtyǵa jabý jazasy kútip tur.

Eske salsaq, Talıban qozǵalysy ótken aıda Aýǵanstandy "Islam ámirligi" dep jarıalap, ýaqytsha úkimet qurdy. Kóptegen el óz azamattaryn Aýǵanstannan evakýasıalady, onyń ishinde Qazaqstan da bar.