Grýzın qoǵamdyq qorǵaýshysy Nıno Lomjarıanyń aıtýynsha, Grýzıada qamaýǵa alynǵan eks-prezıdent Mıhaıl Saakashvılı ózin saıası tutqyn sanaıdy jáne ashtyq jarıalaǵan. Qorǵaýshy Saakashvılı qamalǵan Rýstavı túrmesine barǵanyn málimdedi.

Lomjarıa sonymen qatar Saakashvılıdiń Ýkraına azamaty retinde Ýkraına konsýlymen kezdesýge ótinish bildirgenin málimdedi.

Al Grýzıanyń qazirgi prezıdenti Salome Zýrabıshvılı eks-prezıdent Saakashvılıdi eshqashan keshirmeıtinin aıtady.

"Mıhaıl Saakashvılı Tbılısıdegi turǵyn úılerdiń birinde ustalǵanyn aıtty. Ol jalǵyz ekenin jetkizdi" dedi Lomjarıa.

Premer-mınıstr Garıbashvılı eks-prezıdent Saakashvılı ustalǵanyn, tutqyndaý kezinde de, odan keıin de oǵan kúsh qoldanylmaǵanyn, sebebi ol qarsylyq kórsetpegenin jáne jalǵyz ekenin atap ótti.

Birneshe qylmystyq is boıynsha aıyptalǵan Saakashvılı keshe Tbılısıde qamaýǵa alynǵan.

Mıhaıl Saakashvılı qyrkúıektiń basynda 2 qazanda ótetin mýnısıpaldy saılaý aldynda Grýzıaǵa oralýǵa ýáde bergen. 

Ol Grýzıada ekenin aıtyp, teńiz jaǵalaýyndaǵy Batýmı qalasynan el azamattaryn bılik partıasyna qarsy daýys berýge shaqyrǵan eki beınerolık jarıalaǵannan keıin ustaldy. Onyń Grýzıa shekarasynan qalaı ótkeni áli belgisiz. 

Saakashvılı 2004-2013 jyldary eldiń úshinshi prezıdenti boldy jáne 2012 jyly "Grýzın armany" partıasy bılikke kelgennen keıin 2013 jyly Grýzıadan ketti.

Tutqyndalǵan eks-prezıdent Saakashvılıge qandaı qylmystyq aıyptar taǵyldy?

Mıhaıl Saakashvılıge qatysty alty qylmystyq is qozǵaldy: ol eki is boıynsha alty jylǵa bas bostandyǵynan aıyryldy, al qalǵan tórt qylmystyq is Tbılısı qalalyq sotynda áli qaralýda.

Saakashvılı syrttaı eki jaǵdaı boıynsha aıypty dep tanyldy:

2005 jyly Tbılısıde betperde kıgen qarýly adamdardyń opozısıa depýtaty Valerı Gelashvılıge fızıkalyq shabýyl jasaý isi.

2006 jyly Sandro Gırgvlıanıdi óltirý isi.

Bul eki jaǵdaıda da Saakashvılı bılikti asyra paıdalanǵany úshin kináli dep tanyldy.

Qazirgi ýaqytta Tbılısı qalalyq sotynda tómendegideı ister qaralady.

- 2008 jyldyń aqpanynda tártip saqshylarynyń Imedı telearnasyna zańsyz reıd jasaý isi;

- 2007 jylǵy 7 qarashadaǵy úkimetke qarsy jappaı narazylyq aksıalaryn kúshpen taratý isi;

- 2000 jyldardyń basynda Imedi telearnasyn qurǵan jáne reıdten keıin arna menshiginen aıyrylǵan magnat Badrı (Arkadı) Patarkasıshvılıdiń múlkin zańsyz tartyp alý isi;

Memleket qarajatyn jymqyrý isi.

Grýzıa prokýratýrasy Saakashvılıge shekarany zańsyz buzǵany úshin qosymsha aıyp taǵylatynyn málimdedi.