Shymkent qalalyq sotynda Ákimshilik-rásimdik prosestik Kodeksi normalaryn qoldaný máseleleri boıynsha ótken «dóńgelek ústel» májilisine qalalyq sot pen Ákimshilik sottyń sýdıalary, advokattar men memleket organdarynyń basshylary jáne qyzmetkerleri qatysty.

Jıyn Shymkent qalalyq sotynyń Ákimshilik ister jónindegi sot alqasynyń tóraǵasy G.Qydyrbaeva ashyp, sóz kezegin sot alqasynyń sýdıasy B.Násirdinovke berdi. Sýdıa Ákimshilik ádilettiń alǵashqy nátıjelerimen bólisip, jańa kodekste sot talaptary dálelsiz sebeptermen oryndalmaǵan jaǵdaıda jaýaptylyq qarastyrylǵanyn atap kórsetti. Shymkent qalasynyń mamandandyrylǵan ákimshilik soty shilde-tamyz aıynda tórt laýazymdy tulǵaǵa qatysty aqshalaı óndirip alý qoldanǵany týraly mysaldar keltirdi.

Ákimshilik sottyń sýdıasy N.Rahynbaev eki aıda túsken isterdiń statısıkasyn saralap, Ákimshilik ádilet júıesin, kodeks normalaryn tolyq túsinbeı, sotqa júgingender kezdeskenin aıtty. Kóptegen ákimshilik sot isin júrgizý tártibimen qaraýǵa jatpaýyna baılanysty qaıtarylǵan. Degenmen, kóbine talap qoıýshynyń ózi talap qoıý aryzyn keri qaıtaryp jatty dedi sýdıa.

Májiliste Ákimshilik-rásimdik prosestik Kodeksindegi tatýlastyrý rásimderi týraly sóz boldy. Spıkerler jınalǵandarǵa daýdy sotqa deıin retteý múmkindikteri jaıynda keńinen túsindirdi. Kodestegi «ákimshilik qalaýdy» zań sheńberinde, quzyret sheginen aspaı júrgizýdi usyndy.

Spıkerler ákimshilik talaptyń zań normalaryna sáıkes rásimdelýi aldymen advokattar men qorǵaýshylarǵa baılanysty ekenin aıtyp, saýatty jazylǵan ákimshilik talap óz kezeginde olardyń keri qaıtarylýyn azaıtatynyn alǵa tartty.

Sonymen qatar, Ákimshilik sotqa túsken talaptardyń ishinde sany jaǵynan eń kóbi sot oryndaýshylarynyń áreketterine shaǵymdanýmen baılanysty 2 aıda 81 ákimshilik talap túsken. Osy rette, qalalyq ádilet departamenti basshysynyń orynbasary Aınur Isabekova memlekettik organnyń talap qoıý múmkindikteri týraly aıtyp, Ákimshilik ádilet júıesiniń iske asýy týrasynda oıyn ortaǵa saldy.

Ákimshilik sotqa túsken jalpy 279 ákimshilik talaptyń 42-si memlekettik satyp alý máselelerin kótergen. Saladaǵy daýly isterdiń kóptigi oılandyrmaı qoımaıdy dedi sýdıa B.Násirdinov. Memlekettik satyp alý týraly isterdiń basym bóliginde konkýrstyq komısıanyń hattamasy daýlanatynyn tilge tıek etip, jaýapty organ ókilderine hattamalardy rásimdegende qaıtarý negizderin tolyq kórsetý kerek ekenin eskertti.

Májiliske qatysqandar pikir almasýda belsendilik tanytty. Jıyndy qorytyndylaǵan Shymkent qalalyq sotynyń Ákimshilik ister jónindegi sot alqasynyń tóraǵasy G.Qydyrbaeva Ákimshilik isterde tarazynyń bir jaǵynda memlekettik organ, ekinshisinde – jeke jáne zańdy tulǵalar turǵandyqtan bul saladaǵy zańnamany bilý árkim úshin óte mańyzdy ekenin aıtyp, osy tektes jıyndar aldaǵy ýaqytta da ótkizilip turatynyn aıtty.