Senat depýtaty Aqylbek Kúrishbaev bilim granttaryn taǵaıyndaý men shákirtaqy tóleý tártibin ózgertýge baılanysty úkimet basshysyna usynys jasady.

Senatordyń aıtýynsha, turmysy tómen otbasylardan shyqqan kóptegen daryndy bala joǵary bilimnen tys qalyp otyr. Aýylda pedagog tapshylyǵy áli de bar. Bir muǵalim fızıka, ádebıet jáne mýzykany oqyta beredi. Aýyldaǵy mekteptiń materıaldyq-tehnıkalyq bazasy da máz emes. Al saýalnama kezinde aýyl balalarynyń bireýi de ınternet jaqsy isteıdi dep aıtpaǵan. Sonyń saldarynan kóbisi memlekettik grantqa ótpeı jatady, al aqyly bólimge túsetin aqshasy joq.

– Parlament depýtattary bilim jáne ǵylym mınıstrliginiń aldynda aýyl mektepteriniń túlekterine agrarlyq mamandyqtarǵa túsý úshin aýyldyq kvotany 30 paıyzdan, kem degende, 50 paıyzǵa deıin arttyrý máselesin kóterip keledi. Biraq bul másele tabandy túrde sheshilmeı otyr, – deıdi ol. 

Kúrishbaevtyń aıtýynsha, damyǵan elderde joǵary oqý oryndarynda áleýmettik osal toptar úshin oqý quny bólek esepteledi.

– Shetelde oqýdy tóleýdiń eki túri bar. Barlyǵy úshin shartty qun jáne áleýmettik osal toptardaǵy stýdentterge arnalǵan oqýdyń arnaıy quny. Sonymen qatar kóptegen ýnıversıtette stıpendıa taǵaıyndaýdyń basty talaby jaı ǵana úlgerim emes, otbasynyń tabys deńgeıi de eskeriledi. Osyndaı jáne basqa da baǵdarlamalardyń negizinde bul memleketterde áleýmettik jáne materıaldyq jaǵdaıyna qaramastan, oqımyn degen jáne irikteýden ótken barlyq jasqa joǵary bilim alýǵa múmkindik berilgen, – dedi depýtat. 

Qazaqstanda grant UBT nátıjesi boıynsha beriledi. Al áleýmettik osal toptardyń kvotasy 5 paıyzdan aspaıdy.

– Elimizdiń bilim granttaryn bólý júıesine ózgeris engizetin ýaqyt jetti. Memlekettik granttar men stıpendıalardy testileý nátıjesi men úlgerimniń negizinde ǵana emes, sondaı-aq, memlekettiń qoldaýynsyz oqı almaıtyndarǵa áleýmettik kómek kórsetý maqsatynda bólgen jón. Bul sharalar turmysy tómen otbasylardan shyqqan jastardyń mansaptyq ósýine áleýmettik lıft bolady, – dedi Kúrishbaev.

Osyǵan baılanysty senattyń bir top depýtaty úkimet basshysyna resmı saýal joldap, jazbasha túrde jaýap berýdi surady.