"Amazon" kompanıasynyń negizin qalaýshy Djeff Bezosqa tıesili "Blue Origin" ǵaryshtyq týrısik kompanıasy komersıalyq ǵarysh stansıasyn ushyrý josparyn jarıalady.

Bezos dúısenbide "Orbıtalyq rıf" dep atalatyn stansıa onjyldyqtyń sońyna deıin daıyn bolatynyna úmittenetinin aıtty.

Kompanıa shyǵarǵan jarnama stansıanyń ǵaryshtaǵy "aralas iskerlik park" bolatynyn jáne 10 adamǵa deıin qabyldaıtynyn aıtady.

Kompanıa ony salý úshin "Sierra Space" jáne "Boeing" kompanıalarymen seriktes bolady.

"Blue Origin"-diń 32 000 sharshy fýt stansıasy tutynýshylarǵa "mıkrogravıtasıada fılm túsirý" nemese "eń ozyq zertteýler júrgizý" úshin tamasha oryndy qamtamasyz etetinin aıtty jáne onyń quramyna "ǵarysh qonaq úıi" de kiretinin málimdedi.

Baspasóz máslıhatynda "Blue Origin" jáne "Sierra Space" basshylary qurylys qunyn aıtýdan bas tartty, degenmen jobaǵa 1 mıllıard dollar jumsaýǵa mindet alǵan Bezos úlken qarjy bóletinine senimdi sıaqty. 

Habarlandyrý NASA 20 jyl burynǵy Halyqaralyq ǵarysh stansıasyn (HǴS) aýystyrý boıynsha usynystardy izdestirý kezinde jarıalandy. Stansıany 2030 jylǵa deıin qarjylandyrýǵa kepildik berilgenimen,  ol kóptegen jóndeýdi qajet etedi.

Reseı sheneýnikteri ózeriniń ǵaryshkerleri 2025 jylǵa qaraı stansıadan ketýi múmkin ekenin eskertken, sebebi eskirgen jabdyqtar apatty oqıǵalarǵa sebep bolýy yqtımal.

Jaýap retinde NASA eskirgen jabdyqtardy aýystyrýǵa kómektesý úshin ǵarysh kompanıalaryna 400 mıllıon dollar jeke kelisim-sharttar berý josparyn jarıalady.

Degenmen, qarjylandyrý úshin qatań báseke bolýy múmkin. Osy aptanyń basynda "Nanoracks", "Voyager Space" jáne "Lockheed Martin" seriktestigi 2027 jylǵa qaraı ǵarysh stansıasyn tómen orbıtaǵa shyǵarý týraly óz josparlaryn jarıalady.