29 qazan kúni Nur-Sultan qalasy Qaıym Muhamedhanov atyndaǵy №90 gımnazıada qoǵam qaıratkeri, sanaly ǵumyryn urpaq tárbıesine arnaǵan ustaz Erbol İslámuly atyndaǵy qazaq tili kabıneti ashyldy.

Erbol qazaq tili kabıneti mekteptegi Abaı kitaphanasy, Alash tarıh kabıneti, Muhtar májilis zaly, Maǵjan dárishanasy, Shoqyr sport zaly, Qaıym murajaıynan keıingi tulǵa atymen atalatyn kezekti kabınet. Atalǵan kabınetterdiń bári «Urpaqtar sabaqtastyǵy» atalatyn úlken jobanyń quramdas bóligi. Abaı-Alash-Muhtar-Qaıym-Erbol tizbegi – býyndar jalǵastyǵymen úzilmeı kele jatqan ulttyq ıdeıanyń, alash rýhynyń sabaqtastyǵyn aıqyndaıdy. Mektep óz mısıasyna «ulttyq tárbıe, tól tanym, qazaqy qundylyq» ustanymyn ustyn ete otyryp, alash zıalylarynan qalǵan asyl murany jańǵyrtýdy kózdeıdi. Maǵjan, Júsipbekterden jetken ulttyq pedagogıkany tuǵyr retinde ustanady. 

Erbol İslámuly – sanaly ǵumyryn urpaq tárbıesine arnaǵan ustaz. Ol sondaı-aq astanadaǵy oqý isin uıymdastyrýda da eleýli úles qosqan qaıratker. Atap aıtqanda, Álkeı Marǵulan atyndaǵy №40 mektep, ál-Farabı atyndaǵy oqýshylar saraıy, Qaıym Muhamedhanov atyndaǵy №90 gımnazıa qatarly oqý oryndary men arnaýly mekemelerde basshylyq qyzmet atqaryp, osy mekemelerdiń qazirgi atalyp otyrǵan tulǵalarynyń esimin alýyna tikeleı yqpal etti. Bala tárbıesiniń baǵbany 2021 jyly sońǵy jumys orny №90 gımnazıany basqaryp turǵan mezgilde dúnıeden qaıtty.

Sharaǵa Nur-Sultan qalasy Bilim basqarmasynyń basshylary, astanadaǵy orta oqý oryndarynyń dırektorlary jáne ǵalymdar men qoǵam qaıratkerleri, E. İrgebaıdyń jary Qymbat Muqanqyzy men ózge de týǵan-týystary qatysty.

Ashylý rásiminde  E. İrgebaı ómiri men ónegesin arqaý etken derekti fılm kórsetildi.