Shymkent qalasynda 81 eldi mekenniń 69-y sapaly sýmen qamtylǵan, 5 eldi mekenge kestemen berilse, 7-ine aýyz sý tasymaldanady. «Ákim saǵaty» baǵdarlamasynda qala ákimi Murat Áıtenov eldi mekenderdiń aýyz sýmen qamtylýy jóninde baıandap ótti.

Bıyl qalada 3 magıstraldy sýaqqy men 11 ishki oramdyq júıeniń qurylys júrgizilýde. Osy jyldyń toǵyz aıdyń qorytyndysy boıynsha 2 shaǵyn aýdanda (Turan, Yntymaq-2) qurylys jumysy aıaqtalyp, paıdalanýǵa berildi.

Jyl sońyna deıin sýdy tasymaldaıtyn Soltústik saıajaı, Batys, Jańaturlan, Asar-2, Aqtas turǵyn alabtary men kestemen berilip kelgen Jańatalap, Saýle ( DKZ) sh/a, Nurtastyń jańaqurylys aýmaǵynda qurylys jumysy aıaqtalady. Nátıjesinde 25,6 myń adam aýyz sýǵa qol jetkizip, qamtylý kórsetkishi 95,6%-dan, 98%-ǵa ósedi.

Jyl sońyna 3 magıstraldy sýaqqynyń qurylysy aıaqtalyp, paıdalanýǵa beriledi. Qalamyzdyń damý josparyna sáıkes, aldaǵy 2023 jyly sapaly aýyz sý máselesi tolyǵymen sheshiledi.