Aýa raıynyń sýytýyna baılanysty Shymkent qalasynda jylý berý maýsymy ádettegiden erte bastaldy. Qala ákimi M.Áıtenov qalamyzda 2021-2022 jyldardaǵy jylytý maýsymynyń bastalýy týraly ókimge qol qoıdy.

Ókimge sáıkes, 6 qazannan bastap qaladaǵy 468 búdjettik nysannyń jeke qazandyqtary men avtonomdy jylý júıeleri bar 374 nysanǵa jylý berile bastady. Jeke qazandyqtary bar nemese avtonomdy jylý júıelerimen qamtylǵan 792 kópqabatty turǵyn úılerdiń de jylý júıeleri búginnen bastap iske qosylady.

Ortalyqtandyrylǵan jylý júıesiniń qyzmetin tutynatyn 145 búdjettik nysandar men 1444 kópqabatty turǵyn úılerge jylý kezektik retimen berile bastaıdy. 15 qazanǵa deıingi merzimde barlyq nysandar 100 paıyz jylýmen qamtylady.

Jylý berý erejesine sáıkes, «Kazgıdromet» RMK málimdemesi negizinde 3 táýlik boıy aýa raıynyń ortasha temperatýrasy +8ºS tómen bolǵan jaǵdaıda jylý beriledi.

Byltyrǵy jylytý maýsymy qalada 15 qazanda bastalyp, 5 sáýirde aıaqtalǵan bolatyn.