Qazaqstannyń EGov elektrondyq platformasy Reseılik SBER kompanıasyna berilmeıtin boldy. Bul týraly qoǵam belsendisi Muhtar Taıjan Facebook paraqshasynda habarlady.

Belsendi 9 qarasha kúni elordada Saraptamalyq keńestiń birinshi otyrysy ótkenin, kezdesýge kóptegen qazaqstandyq IT kompanıalar men ózi qatysqanyn málim etti.

Taıjan jıyn barysynda mınıstr Baǵdat Mýsın reseılik Sberbank Qazaqstandaǵy sıfrlandyrýmen aınalyspaıtynyn, eldigide eldiń sıfrlyq damýymen tek otandyq kompanıalar shuǵyldanatynyn aıtqanyn jetkizdi.

"Sáıkesinshe, Sberbankke Qazaqstan azamattarynyń eshqandaı jeke derekteri berilmeıdi. Sberbank eshqashan bizdiń derekter bazasyna qol jetkize almaıdy. Azamattardyń derekter bazasy tek Qazaqstan aýmaǵynda saqtalady. 500 mıllıon dollar (Qazaqstan úkimeti men Reseılik kompanıa arasyndaǵy kelisim quny - red) negizinen elde qalyp, aldaǵy 5 jylda otandyq İT kompanıalar men olardyń qyzmetkerlerine tólenedi. Olar ózimizdiń serverlik bazany ázirleýge tıis. Sıfrlandyrýdyń jańa baǵdarlamasy 5 jylǵa josparlanǵan" degen belsendi mundaı sheshim azamattyq qoǵam arqa synda júzege asqanyn jetkizgen.

Muhtar Taıjannyń málimdemesinde aıtylǵandarǵa baılanysty ázirge resmı aqparat shyqqan joq.

Buǵan deıin Qazaqstan premer-mınıstr Asqar Mamın men reseılik SBER kompanıalar tobynyń basshysy German Gref Qazaqstannyń sıfrlyq transformasıasy, sıfrlandyrýdyń platformalyq modeline jáne "Data-Driven Government" tujyrymdamasyna kóshý jónindegi jobalardy iske asyrý salasyndaǵy yntymaqtastyq týraly memorandýmǵa qol qoıǵan. Ol boıynsha reseılik kompanıa Qazaqstanǵa Data-Driven Government (derekter negizindegi úkimet) tujyrymdamasyn jasap berýge tıis bolǵan. Joba quny 500 mıllıon dollarǵa baǵalanǵan.

Qazaqstan úkimetiniń reseılik kompanıamen áriptes bolatyny qoǵamda narazylyqqa tap bolyp, bılik ótkir syn astynda qalǵan. Jobany synaýshylar eger úkimet SBER kompanıasymen kelisimge kelse, Qazaqstan sıfrlyq egemendigine qaýip tónetinin aıtady.