Májilis Tóraǵasy Nurlan Nyǵmatýlın Fransýz Respýblıkasynyń Qazaqstandaǵy Tótenshe jáne Ókiletti Elshisi Dıde Kanesspen Qazaqstan men Fransıa arasyndaǵy yntymaqtastyqtyń basym baǵyttaryn talqylady.

Kezdesýde Fransıa elimizdiń Eýropalyq Odaqtaǵy strategıalyq áriptesi ekenin aıtqan Májilis Spıkeri Qazaqstan basshylyǵynyń ekijaqty saıası baılanystardy nyǵaıtýǵa, sondaı-aq eki el arasyndaǵy saýda-ekonomıkalyq ózara is-qımyldy keńeıtýge erekshe nazar aýdaratynyn atap ótti.

Nurlan Nyǵmatýlın Memleket basshysynyń bastamasymen elimizde ótip jatqan saıası júıeni reformalaý, ekonomıkany jańǵyrtý, azamattyq qoǵamdy damytý úrdisterine nazar aýdardy.

Sonymen qatar, taraptar ekijaqty yntymaqtastyqty tereńdetýdiń basym baǵyttary týraly aıta kele, kólik jáne energetıka, densaýlyq saqtaý jáne bilim berý salalaryn atap ótti.

Fransıa elshisi Dıde Kaness turaqty damý jáne «jasyl» ekonomıkaǵa kóshý salasynda qos memleket arasyndaǵy qarym-qatynastardy damytý basymdyqqa ıe ekenin aıtty. Budan basqa, Qazaqstan men Fransıanyń aýyl sharýashylyǵyndaǵy ózara is-qımyldyń áleýeti zor ekenine toqtaldy.

Nurlan Nyǵmatýlınniń aıtýynsha, beıindi komıtetter men yntymaqtastyq jónindegi toptar arasyndaǵy turaqty kezdesýler tájirıbesin qaıta bastaý zańnamalyq qyzmetti, onyń ishinde ónerkásipti ekologıalyq transformasıalaý, sıfrlandyrý jáne t. b. máseleler boıynsha tájirıbe almasýǵa yqpal etetin bolady.

Májilistiń baspasóz qyzmeti