Qazaqstanda suranysqa saı kelmeıtin 50 mamandyq boıynsha kolejderde oqytý toqtatyldy. Bul týraly bilim jáne ǵylym mınıstrligi habarlady.

Búginde kolejderde synama irikteýshi, sham jasaýshy, gýverner, zańger-konsýlt jáne taǵy basqa mamandyqtar boıynsha qabyldaý toqtatyldy. Sondaı-aq jikteýshiden "Bilim berý uıymynyń zerthanashysy", "Patenttaný" jáne basqa da mamandyqtar alynyp tastaldy. 

Bilim júıesindegi bul jumystar, eńbek naryǵyndaǵy suranystarǵa saı kelýi úshin jasalǵan. Endigi kezekte oqý prosesine jańa bilim berý baǵdarlamalary engizilip jatyr.

– Bizdiń basty maqsatymyz – bilim berý baǵdarlamalary men oqytylatyn mamandyqtardy jumys berýshilerdiń zamanaýı suranystaryna sáıkestendirý. Sondyqtan biz úlken taldaý jumystaryn júrgizip, eńbek naryǵyna monıtorıń júrgizdik. Jumys berýshilermen jáne salalyq qaýymdastyqtardyń ókilderimen kezdestik. Olardyń usynystaryn eskere otyryp, mamandyqtar jikteýishisin jańarttyq. 

Endi qazaqstandyq kolejderde "Robototehnıka jáne endirilgen júıeler", "Nanomaterıaldar negizindegi buıymdar tehnologıasy", "Óndiristiń addıtıvti tehnologıalary", "Qashyqtan basqarylatyn avıasıalyq júıe", "Ǵımarattardy jobalaý men paıdalanýdyń avtomattandyrylǵan júıeleri", "Jylyjaı sharýashylyǵyn uıymdastyrý","Grafıkalyq jáne mýltımedıalyq dızaın", "Tas óńdeý óndirisi", "Landshaftyq dızaın", "Jyljymaıtyn múlikti basqarý", "Destınasıany basqarý", "Qurylystaǵy smetalyq is", "Eńbekti qorǵaý jáne tehnologıalyq prosesterdiń qaýipsizdigi" jáne basqa da jańa mamandyqtar oqytylady, – dedi bilim jáne ǵylym mınıstrligi tehnıkalyq jáne kásiptik bilim berý departamentiniń dırektory Nasymjan Ospanova.