Qazaqstannyń kóptegen qalalaryn sharpyǵan halyq narazylyǵynan keıingi jappaı tártipsizdik basylyp, búginde quqyq qorǵaý organdary kúdiktilerdi ustaý, tergeý jumystaryn júrgizip jatyr. Alaıda áleýmettik jelide polısıa alańda eshteńe búldirmesten, beıbit túrde talabyn aıtqan adamdardy da ustap, bólimshelerde olarǵa kúsh kórsetip jatqany týraly derekter shyǵyp jatyr. Osyǵan baılanysty facebook jelisinde aqyn, jýrnalıserden turatyn bir top adam bılikti, onyń ishinde quqyq qorǵaý organdaryn jazyqsyz azamattardy qýǵyndamaýǵa úndep, tergeý-tekserý sharalaryn ádil júrgizýge shaqyryp jatyr.
EL QAMYN OILAǴAN EREÝİLSHİLER men ELGE QARSY LAŃKESTERDİ AIYRA BİLEIİK!
Qazybek Isa
Parlament májilisiniń depýtaty
Biz eń aldymen árnárseni anyqtap alyp, óz atymen ataýymyz kerek! El qamy úshin Ereýilge shyqqandar men Memleketke qarsy lańkestikti, halyqqa qarsy qaraqshylyqtyń basyn aıyryp alýymyz kerek! Óıtkeni, El qamy úshin ereýilge shyqqandar
- elge qarsy soǵyspaıdy,
- eshkimdi óltirmeıdi,
- aýrýhanaǵa, jedeljárdemge, ákimshilik oryndarǵa, polısıaǵa, quzyrly oryndarǵa, bankige, dúkenderge, mádenı oryndarǵa, halyqtyń múlkine, kóligine shabýyl jasap, órtep jibermeıdi!
- Telearnalarǵa shabýyl jasap, el tarıhynyń altyn qoryn órtep jibermeıdi.
- Dárigerlerdi, naýqastardy, Jedeljárdemdi, Qyzyl kres, Jarty aı qyzmetkerlerin qandaı soǵys kezinde de eshkim uryp-soǵyp, tonamaıdy!
Almatyda polısıa men áskerden 16 bozdaq óltirildi, eki polısıanyń basyn kesip alǵan. Myńnan asa adam jaraqat alǵan, júzge jýyǵy jansaqtaý bólimderinde jatyr. Olardyń 200-deıi áıelder men qyzdar!
Bul qaza tapqandar, aýyr jaraqat alyp, tonalǵandar, bizdiń baýyrlarymyz, analarymyz, ápke-qaryndastarymyz, qyzdarymyz emes pe?!. Bundaı jaýyz qanisherlikti qalaı jazasyz qaldyrýǵa bolady? Mádenı ordamyz – arý qalamyz Almatynyń tas-talqanyn shyǵarǵan soǵys boldy, áli basyla qoıǵan joq!
Tipti, bes telearnany basyp alyp, “Qazaqstan” ulttyq arnany, ordaǵy Altyn qorymyzdy, ıaǵnı, óz tarıhymyzdy órtep, tonaýshylar ishinde olardy bastap, saqaly sapsıǵan (jasyna baılanysty sóz), ózderin “saıasatker” sanaıtyn, “Ańqaý elge Aramza moldalar” júrgenine ne deýge bolady?!. Bular sonda ózimizdiń ulttyq qundylyqtarymyzǵa, óz tarıhymyzǵa, memleketimizge qarsylar ma?!.
"Medaldyń eki jaǵy bar" degendeı, jazalaý “shash al dese, bas alýǵa” jalǵasyp, endi jazyqsyz jastar jazaǵa ilinip ketpeýi tıis! Bizde san qýalap, jospar oryndaý degen keleńsizdikter buryn da bolǵan.
Jas balalarǵa bireýdiń aýyr qylmysyn naqaqtan naqaq jaba salýǵa jol bermeńizder
Aqberen Elgezek
Qazaqstan jazýshylar odaǵy
basqarma tóraǵasynyń birinshi orynbasary
Bolary bolyp, boıaýy sińip úlgirmegen kezeńde otyrmyz. Boıaý demekshi, “boıaýshy, boıaýshy degenge saqalyn boıapty” degen mátelimiz bar. “Shash al dese, bas alady” degen de bizdiń mátel. Beker aıtylmaǵan. Ǵasyrlar boıy ómirlik tájirıbeden suryptalyp shyqqan sózder.
Pálen myń sodyr, lańkes, qoǵamdyq tártip buzýshy, tonaýshy-qylmysker ustaldy dep jatyr. Endi osy lańkesin bólek bólip, bir qoraǵa, qoǵamdyq tártipti buzýshylar men maroderlerdi bólip, bólek qoraǵa qamap, jaza shyǵararda oılanǵan abzal. “Bireý qyz alyp qashypty, bireý bosqa qashypty” degen de bizdiń sóz. Sol turǵydan qaraý kerek. Álbette, oqıǵaǵa qatysýshy zańdy buzyp, qylmysy dáleldense, ol - aıypty. Biraq, ár qylmystyń ózine saı jazasy bolady emes pe. Dúrbeleń kezinde kórseqyzarlyǵy ustap dúkenge kirip, zat urlaǵan nemese “halyqtyq sherý eken, men de úni bar azamatpyn ǵoı!” dep kózqarasy úshin alańǵa shyqqandardy eshýaqytta lańkeske teńep, oǵan aýyr jaza kesý - ádilettiń isi bolmaıdy. Osyǵan quqyq qorǵaýshy, kúshtik organdar basa nazar aýdarý kerek.
Kezinde Atyraý jaqta bir sultan mal urlaǵan 10 jigitti ustap ap, ashý ústinde Sibirge aıdamaqshy bolypty. Sol kezde dýannyń qarıalary sultanǵa baryp: “Sen 10 adamdy emes, 60 adamdy ıtjekenge aıdatqaly otyrsyń!” degen eken. Sonda sultan: “Qaıdaǵy 60 adam, aldarynda 10 jigit turǵan joq pa?!”- depti. Sol kezde qarıalar aıtypty deıdi: “Myna turǵan ár jigittiń belinde 6 balanyń uryǵy bar. Eger sen bulardyń kózin qurtsań, qazaq 10 kisige emes, 70 kisige kemıdi!”. Sultan aqyldy bolmasa, nesi sultan, tez uǵyna qoıyp, raıynan qaıtqan kórinedi. Ár 10 jigitke qylmysynyń salmaǵyna sáıkes aıyppul salyp, qoıa bergen deıdi.
Osynyń bárin nemenege táptishtep jazyp otyrǵanymdy túsinip otyrǵan bolarsyzdar. Talaı jaýyngerden, polısıa jáne qaýipsizdik qyzmetiniń ofıserlerinen, beıbit turǵyndardan, kip-kishkentaı balalardan aıyryldyq. Úlken tragedıa! Olardyń ornyn eshkim toltyra almaıdy. Ásirese ata-ana úshin. Solardyń ólimine naqty qatysy barlardy aıaýsyz, qatań jazalaý kerek! Oǵan daý joq! Alaıda bireýdiń aýyr qylmysyn ıa bolmasa buryndary ashylmaı jatqan qylmystardy jas jigitterimizdiń moıynyna ile salý bolmasyn! Árqaısysynyń qylmysyn naqty anyqtap, isti ádil júrgizý joǵarǵy bıliktiń de, qoǵamnyń da baqylaýynda ustaý múmkin emes.
Sondyqtan bizdiń tergeýshiler, ózge de quqyq qorǵaýshy mamandar! Ashý ústinde, áriptesimniń óshin alam dep, bolmasa isti tezirek bitirem dep naýqanshylyqqa salynyp, jas balalarǵa bireýdiń aýyr qylmysyn naqaqtan naqaq jaba salýǵa jol bermeńizder. Adam kórmese de, Alla kórip tur. Sony umytpańyzdar. Kez kelgen ádiletsizdikke - Qudaı tarapynan jaza bar, kez kelgen ádilettilikke - Táńir tarapynan saýap bar. Ári beriden soń, Ardyń soty jaman. Ol tozaq otynan da beter kúıdiredi.
Búgin repressıaǵa jol berseńder, alda bizdi shyn revolúsıa kútip tur!
Dına Elgezek
Jýrnalıs
Dinı ekstremızmge qatysy joq musylman baýyrlarymyzdy, saıası azamattyq kózqarasyn bildirý úshin mıtıńke shyqqan qazaqty qýdalap, jala jaýyp, túrmege tyǵýdy toqtatyńdar! Mıtıńke shyǵý - qylmys emes! Árbir azamattyń saıası erki! Saıası erkindikke qol suǵý toqtatylsyn!
Qazaq óz qazaǵyn qorqytyp eshqashan el bolmaǵan! Onsyz da aldanyp ashynyp otyrǵan qazaq erteń odan beter ashynyp, sodan soń ony toqtatý qıyn bolady. Senderdiń klanaralyq qaqtyǵystaryńa qarapaıym halyqtyń qatysy joq! Razbıraıtes samı! Búgin repressıaǵa jol berseńder, alda bizdi shyn revolúsıa kútip tur! Senderdiń eski ádisteriń endi ótpeıdi! Repressıany toqtatyńyzdar!
SAÝ SANALY ADAMNYŃ ÁŃGİMESİN AITAIYQSHY...
Qanat Ábilqaıyr
Jýrnalıs
Jaı ǵana saý sanaly adamnyń áńgimesin aıtaıyqshy...
Jasy jıyrmaǵa da tolmaǵan sarbazdar ne úshin, kim úshin, nege bola jan tapsyrdy?
Besikten beli shyqpaǵan 4,11 jastaǵy sábılerdiń ne kúnási bar edi?
Qańǵalaqtap júrip oq qushqan beıbit sherýshiniń suraýyn kimnen suraımyz?
Esh kinási bolmasa da ustalyp, kókala qoıdaı sabalyp, taıaq jep jatqan jigitterdi kim qorǵaıdy?
"Lankes" bar shyǵar, "arandatýshy" bar shyǵar, solardan ala almaǵan kekti túk kúnási joq qara halyqtan alamyz ba (Bas lankestiń, bas arandatýshynyń aty nege atalmaıdy)?
Maǵan búgin birneshe adam habarlasty. Esh kinási bolmasa da, 11-12 saǵat boıy taıaq jegen. Olardyń ishinde aty qazaqqa tanylǵan Qaısar Qaýymbek, Retbek Maǵaz, Aıbol Mináýar sekildi aqyn jigitter bar.
Adam quqyǵy degen dúnıe qaıda qaldy? Adamnyń ómiri konstıtýsıamyzdaǵy basty qundylyq sanalmaýshy ma edi? Bizge Qazaqstan kerek. Bizge Qazaqstan dep soqqan júrek kerek. Bizge ǵana emes, aldymen ol júrek bıliktegilerge qajet bolýy kerek edi. Eldi ashyndyryp, eshkim de jeńiske jete almaıdy... Ondaı jeńistiń bu halyqqa elý teńgelik quny joq...
Alańǵa shyqqannyń bári "terrorıst" emes
Maqsat Tolyqbaı
Jýrnalıs
Qańtardyń besine qaraǵan túni Almatyǵa ushyp baryp, "Almaty arenanyń" mańyna jınalǵan eldiń arasynda biz de júrdik. Jańaózendikterdi qoldap, beıbit sherýge shyqqan halyqtyń qarasy kóp boldy.
Jazyqsyzdar "lańkes" atanyp ketpese eken deımin. Tergeý ádil júrgizilsin! Al, qandyqol qylmyskerlerdi jáne josparly túrde kúshtik qurylymdardy qural retinde paıdalanyp, memleketke satqyndyq jasaǵandardy aıaýsyz, qatań jazalaý kerek!
Prezıdenttiń úndeýinde qamtylmaǵan sala qalmady. Endi naqty qadamdar kútemiz. "Qazaqstanda damýdyń jańa kezeńi bastaldy" degen urandar 
uran kúıinde qalsa
halyq taǵy da kóshege shyǵýǵa májbúr bolady.Jańa saıasatty eski kadrlar qalaı júrgizedi? Ýaqyt kórsetedi. Olıgarhtarmen kúrese almasa, taıaq aınalyp ózderine tıedi.Parlament te jańarǵan Qazaqstanǵa saı bolý kerek. Depýtattyq saýaldarǵa úkimettiń bir paraq qaǵazben qaıtaratyn jaýabyn mise tutýdy doǵarý qajet. Parlamenttiń róli, quzireti qoldan nemese zańmen kúsheımeıdi. Depýtattar, bári ózderińizdiń tabandylyqtaryńyzǵa baılanysty. Halyqtyń muńy alańda emes, parlamente aıtylý kerek.
Pikir qaldyrý