Taldyqorǵanda komendanttyq saǵat ýaqytynda bir otbasynyń úsh adamy mert bolǵan. Bul týraly Ekspress K basylymy habarlady.
Marqumdardyń týystarynyń aıtýynsha, olar qonaqtan úıine qaıtyp kele jatqanda kólikterine áskerıler oq atqan. Qaıǵyly jaǵdaı 8 qańtar kúni keshki saǵat 21:00-den óte, Aqbastaý jáne Jabaev kósheleriniń qıylysynda bolǵan. Olardyń denesin týystary 11 qańtarda jer qoınyna tapsyrǵan.
– Olar dosynyń úıinen qonaqtan kele jatqan. Komendanttyq saǵat 21:00-den keshikpeıik dep úıine qaraı shyqqan. Ol marqumdardyń úıinen alys emes. Ary ketse 2-3 mınýtta jetetin jer. Soǵan jete almaı qalyp otyr emes pe?! Áskerıler atyp tastap otyr. Keshe jerledik. Qazir toqtamaǵan soń atty degen áńgime shyǵyp otyr. Qarap tursańyz toqtatsa kez kelgen adam toqtaıdy ǵoı. Toqtamaǵan kúnniń ózinde bas salyp oq jaýdyrý durys emes qoı. Úsheýi de týra sol jerde ólip ketti, – deıdi marqumdardyń týysy Rústem Ahmetjanov.
Qaıǵyly jaǵdaıdan beri 4 kún ótse de marqumdardyń týystaryna quzyrly organ tarapynan eshkim kelmegen.. Rústem Ahmetjanov úsh birdeı týysy úshin sońyna deıin baramyn dep otyr.
– Quzyrly organdarǵa aryzdanamyz. Óıtkeni aı-kúnniń amanynda bir úıden úsh máıit shyǵaryp otyrmyz. Ákimdikten, Polısıa departamentinen eshkim kelmedi. 4 kún boldy, mine, eshkimdi kórgen joqpyn. Biz bul jaǵdaıdy jyly jaýyp qoımaımyz, – deıdi Rústem Ahmetjanov.
Pikir qaldyrý