Májilis depýtaty Qazybek Isa Qańtardaǵy memlekettik tóńkeris áreketin uıymdastyrýshylar túgel anyqtalyp, tegis jaýapqa tartylýǵa tıis ekenin aıtty.

"Másele Másimovpen ǵana bite qalmaıtynyn, mánisi tym tereńde jatqanyn  eldiń bári jaqsy bilip otyr! Sondyqtan barlyq shyndyq ashyq aıtylǵanda ǵana el bılikke senedi. Áıtpese, senimge selkeý túsip, saıası ereýil jalǵasa beredi. Qańtar qasireti qaıtalanbaýy úshin kúshtik qurylymdardy, eń aldymen Ulttyq qaýipsizdik komıtetin tazalaý qajet. Qorǵanys mınıstrligi  atyna saı bolýy tıis. Synalap syrttan kelgen, barlyq daıyndyqtan ótken qaptaǵan lańkester men sodyrlar elimizge qalaı kirgen? Elimizde memleketke qarsy tóńkeris uıymdastyrylýyna bizdiń arnaýly organdar nege jol bergen? Quzyrly organdardy el basyna kún týǵanda satyp ketkenderden túgel tazartý kerek! Jańa basshylaryna Prezıdent pen parlament aldynda Ant qabyldatý kerek! Memlekettik tilde ǵana jazylýy tıis  Antty túsinip, túısine alatyndardy ǵana basshylyqqa taǵaıyndaý kerek! Óıtkeni, Tilin qorǵaı almaǵandar Elin de qorǵaı almaıdy!" degen ol dinı radıkalızmge zańmen tyıym salatyn kez jetti dep sanaıdy.

Sondaı-aq ol úkimet jumysyn synap ótti. 
 
"Jańa Úkimettiń jańasha jumysyn qashan kóremiz?. Aýyl sol baıaǵy tozyp barady. Bir salaǵa birneshe basshy bolsa da, bir-birine siltep, eshkim eshnárse sheshpeıdi. Sheneýnikter elmen qalaı sóılesýdi bilmeıdi. Úkimettiń áreketsizdigi sonsha, eger barlyǵyn ákimdermen qosyp birer kún basqa jaqqa áketip qalsa da, elde eshnárse ózgermeıtin jaǵdaıǵa jettik. Endeshe olardyń ne keregi bar?.. Bizge Eldiń jaǵdaıyn jaqsartatyn, HALYQTYŃ TİLİNDE SÓILESE ALATYN ULTTYQ ÚKİMET KEREK!" deıdi depýtat.

Qazybek Isa sonymen qatar parlamentte “Aq jol” fraksıasy 10 jyldan beri kóterip kele jatqan shetelderdegi ofshorlyq aımaqtarǵa ketken 167 mlrd dollardy qaıtarý máselesi kún tártibine qaıta shyqqanyn aıtty.

"Prezıdent atap aıtyp, arnaıy tapsyrma berdi, endi tıisti organdar ne qarap, kimdi kútip otyrsyzdar? El jaǵdaıy qıyn, al biz halyq qazynasynan urlanǵan mıllıardtardy qaıtara almaı qarap otyrmyz?! Negizi, olıgarhtardan qaıyr tilegendeı surap otyrǵansha, Mendeleev kestesiniń bári tabylatyn qazaq jeriniń qazba baılyǵyn, kenen kenishin túrli quıtyrqy zańsyz joldarmen qolǵa túsirip baıyǵandardan sol baılyqtyń, keminde 80 paıyzyn, al qazba baılyq oryndaryn túgel qazynaǵa qaıtarýdy qatań talap etý kerek! Óıtkeni, ol qazba baılyqtar olardyń da, eshkimniń de ata-babasynan qalǵan mura emes, Qudaı bergen qalyń Qazaqtyń baılyǵy" deıdi ol.