Búgin «AMANAT» partıasynyń mobıldi qoǵamdyq qabyldaýy óz jumysyn bastady. Bul bastama partıany transformasıalaý jumystarynyń azamattarmen keri baılanysty kúsheıtý tarmaǵynyń aıasynda júzege asyrylýda. Birinshi bolyp Qaraǵandy jáne Aqmola oblystarynyń 10 shalǵaı eldi mekeninde mobıldi qoǵamdyq qabyldaýlar ashyldy.

Kezekten tys HHİİ sıeze «AMANAT» partıasynyń tóraǵasy Qasym-Jomart Toqaev partıa jumysyn qaıta qurýdy tapsyryp, qoǵamdyq qabyldaý bólmeleri tek shaǵymdarmen ǵana emes, eldi damytý boıynsha naqty ıdeıalarmen keletin azamattar úshin óz oılary men usynystaryn ortaǵa salatyn orynǵa aınalýy tıis ekenin atap ótti. «Azamattardy kóshpeli qabyldaýdy jıi ótkizip, shalǵaı aýyldardyń turǵyndarymen kezdesý kerek», - dep atap ótti sol kezde partıa tóraǵasy.

Aldaǵy úsh aıda mobıldi qoǵamdyq qabyldaýlar Qazaqstannyń barlyq óńirlerin aralap, shalǵaı aýyldarǵa erekshe kóńil bóledi. Mobıldi qabyldaý bólmeleriniń jumysyna máslıhat depýtattary - partıa fraksıasynyń músheleri, óńirlik fılıaldardan Búro men Saıası keńes músheleri, qoǵamdyq keńester men memlekettik organdardyń ókilderi jáne t.b. qatysady.

Mobıldi qoǵamdyq qabyldaýlar turaqty túrde jumys isteıtin bolady.

Kúni búgin partıa músheleri Aqmola jáne Qaraǵandy oblystarynyń turǵyndarymen kezdesýge keldi. «AMANAT» partıasynyń Respýblıkalyq qoǵamdyq qabyldaý bólmesiniń jetekshisi Álıa Sadyrbaevanyń aıtýynsha, birinshi kúni 100-ge jýyq adam qabyldanǵan.

«Aýyl turǵyndary partıanyń aýdandyq nemese oblystyq fılıalyna árdaıym kele bermeıdi jáne olarǵa máseleni oblystyq máslıhattaǵy partıa fraksıasynyń depýtattaryna jetkizý ońaı emes. Biz turǵyndardyń túıindi máselelerdi alǵa tartyp kelýin kútip otyrmaı, olarǵa ózimiz baramyz. Bul bir rettik aksıa emes, endi turaqty túrde bolady. Bul tipti, shalǵaı aýyldardyń problemalaryn nazarǵa alyp, sol boıynsha júıeli sheshimder qabyldaý úshin aqparatty taldaýǵa múmkindik beredi», - dep atap ótti Álıa Sadyrbaeva.

Qoǵamdyq qabyldaýǵa alǵashqylardyń biri bolyp kelgen Aqmola oblysyna qarasty Novoselskoe aýylynyń turǵyny Svetlana Pal eldi mekendi sýmen jabdyqtaý máselesin kóterdi. Onyń aıtýynsha, sýmen jabdyqtaý jelileriniń ábden tozyǵy jetip, búginde kúrdeli jóndeýdi qajet etedi.

«Sýdyń jıi-jıi úzilip qalýy, múldem aqpaı qalýy bizderge tańsyq jaǵdaı emes. Sondyqtan da sý aqqan kezde ydystarymyzdy toltyryp alýdy ádet qylǵanbyz. Bul qart adamdarǵa, ásirese jalǵyzbasty adamdar qıyndyq týǵyzady», - dedi Svetlana Pal.

Óz kezeginde mobıldi qoǵamdyq qabyldaýdyń quramyna kirgen Atbasar aýdanynyń ákimi Amanbek Qaljanov partıanyń saılaýaldy baǵdarlamasyn oryndaý aıasynda Novoselskoe aýylynda sýmen jabdyqtaý jelilerin tartý jumystary bıyl bastalýy tıis ekenin aıtty.

Qoǵamdyq qabyldaýda budan basqa kóshelerdi jaryqtandyrý, joldardy jóndeý, ınjenerlik jeliler men áleýmettik ınfraqurylymǵa qatysty máseleler kóterildi. Aýdandyq máslıhattaǵy partıa fraksıasynyń tóraǵasy Nurjan Rahymovtyń aıtýynsha, árbir ótinish boıynsha jaýapty tulǵalar men oryndaý merzimderi belgilenedi.

«Partıalyqtar halyqpen tikeleı dıalog ornatýǵa, olardyń talap-tilekteri men suranystaryn tyńdaýǵa keldi, bul óte durys. Mundaı kezdesýlerdi múmkindiginshe jıi uıymdastyrǵan jón», - degen aqsaqal Hasen Qalmenbaev amanattyqtarǵa alǵysyn bildirdi.

Amanattyqtar Aqmola oblysyna qarasty Novoselskoe, Chapaevskoe, Aqsaı, Úlgi, Sabyndy sıaqty barlyǵy 5 aýylǵa bardy. Osy kúni «AMANAT» partıasynyń mobıldi brıgadalary Qaraǵandy oblysynyń shalǵaı eldi mekenderiniń turǵyndaryna da qabyldaý ótkizdi. Partıalyqtar Egendibulaq, Sheshenqara, Dýbovka, Bıdaıyq, Orynbaı aýyldarynda boldy.

Egindibulaqta jergilikti turǵyndar malǵa shóp jáne jaıylymdyq jerlerdiń joqtyǵyna shaǵymdandy. Al, Sheshenqara turǵyndary uıaly baılanys pen aýyl ishindegi joldardyń sapasyna qatysty máselelerdi alǵa tartty. Dýbovkada ınjenerlik jelilerdi jóndeý jáne gazdandyrý máselesi ózekti bolyp tur. Bıdaıyq aýylynda turǵyndar feldsherlik-akýsherlik pýnkt salýdy jáne elektr qýatynyń sapasyn jaqsartý úshin qosymsha transformator ornatýdy surap otyr. Orynbaı aýylynda aryz-shaǵymdardyń basym bóligi tozyǵy jetken elektr jelilerine qatysty bolsa, jerrgilikti sharýalar aýylsharýashylyq taýar óndirýshileriniń nesıe qarajatyna qoljetimdiligin arttyrýdy talap etýde. Barlyq suraqtar amanattyqtardyń baqylaýyna alyndy.

«AMANAT» partıasynyń qoǵamdyq qabyldaýyna jyl basynan beri 24,7 myń adam júgingen. Turǵyndardy negizinen áleýmettik qamsyzdandyrý – 32%, turǵyn úı-kommýnaldyq sharýashylyq – 14%, jumyspen qamtý jáne eńbek quqyqtarynyń buzylýy – 11% sekildi máseleler tolǵandyrady. Osy máselelerdiń 56%-y sheshimin tapty. Partıa taratqan málimetke sáıkes, mobıldi qoǵamdyq qabyldaýdyń iske qosylýyna baılanysty bul sandar aıtarlyqtaı óskenin.