Almatyda prezıdent Qasym-Jomart Toqaevtyń joldaýynda aıtylǵan saıası reformalar baǵdarlamasyn qoldaý maqsatynda «AMANAT» partıasy qalalyq fılıalynyń uıymdastyrýymen mıtıń ótti.

Shoqan Ýálıhanov atyndaǵy alańda ótken beıbit sherýge kóptegen salanyń ókilderi qatysty. Olardyń ishinde partıa jáne qoǵam belsendilerinen bólek, májilis depýtattary, kásipkerler, ǵylym men mádenıet salasynyń ókilderi, sportshylar, jastar jáne qala turǵyndary bar.

Mıtıńke qatysýshylar saıası júıeni keshendi jańǵyrtý baǵdarlamasyn qoldaıtyndaryn bildirip, arnaıy transparanttarmen keldi.

Jınalǵandar aldynda sóz sóılegen «AMANAT» partıasynyń atqarýshy hatshysy Asqat Oralov jańa syn-qaterler jaǵdaıynda birigip, táýelsizdigimizdi qorǵaý, ata-baba amanatyn keıingi urpaqqa tutas jetkizý basty paryz ekenin alǵa tartty.

– Bizdiń baǵytymyz – aıqyn, maqsatymyz – ortaq. Biz – kózi ashyq, kókiregi oıaý azamattardy birlesip jumys isteýge shaqyramyz! Basqa partıalar bılikke jetýdi kózdese, biz eń áýeli táýelsiz Qazaqstannyń múddesi úshin jumys isteımiz! Ardaqty aǵaıyn, Abaı atamyzdan qalǵan amanat sóz bar: «Birińdi qazaq, biriń dos, Kórmeseń istiń bári bos». Sondyqtan, kúshimizdiń birlikte ekenin kórsetip, Jańa Qazaqstandy birge quraıyq! Biz birgemiz!, – dedi Asqat Oralov.

Beıbit mıtıńke qatysqan QR Ulttyq ǵylym akademıasynyń akademıgi, tarıh ǵylymdarynyń doktory, profesor Hankeldi Ábjanov babalarymyz birliktiń qudiretin, ony saqtaýdyń shartyn osydan myń jyl buryn tasqa jazyp ketkenin aıtty.

– Kúlteginniń tasynda bylaı deıdi: «Bekteri, halqy túzý, adal bolmaǵandyqtan, tabǵach halqynyń aldaýyna sengendikten, arbaýyna kóngendiginen, bekteri men halyqtyń ymyrasyzdyǵynan túrik halqy eldiginen, elinen aıyryldy». Eldigi degen memlekettigi degen sóz. Al endi osyndaı amanat qaldyrǵan babalardyń dástúrin jalǵastyrǵan Abaı, «birlik malǵa satylsa, ol anturǵannyń basy» deıdi. Keshegi qańtar qasireti – sol malǵa, aqshaǵa satylǵandardyń isi. Ondaılarǵa Qazaqstan, qazaqtyń jeri, tili kerek emes. Olardyń kózdegeni tek mal, aqsha, baılyq qana. Al bizdiń azattyǵymyz álemniń baılyǵynan da qymbat, – degen ǵalym qańtar oqıǵasynan sabaq alyp, Qazaqstannyń árbir azamatyn óte saq, belsendi, yjdaqatty jumys isteýge úndedi.

– Keshegi prezıdentimizdiń joldaýy – bul Jańa Qazaqstandy qurýdyń baǵdarlamasy. Mundaǵy bastamalar, ásirese, saıası reformalar qalyń qazaqty, qarapaıym halyqty bılikke tartýǵa, olardy belsendi qoǵam qurýshyǵa aınaldyrýǵa baǵyttalǵan. Halyq jumylmaı, Qazaqstan jańa bola almaıdy. Halyq qoldamaı, birde-bir basshynyń jospary júzege aspaıdy. Árdaıym saq bolyp, aldaǵy isimizdi jasampazdyqpen sapaly atqaraıyq, – dedi Hankeldi Ábjanov.

– Meniń ultym – ýkraın, biraq júregim qazaq dep soǵady! Sebebi, men osy elde týyp-óstim, bilim aldym, dostarymnyń barlyǵy derlik qazaqtar, – degen Qazaqstan-Reseı medısınalyq ýnıversıtetiniń 2-kýrs stýdenti Arıana Belobjıskaıa jastardy eń aldymen memleket múddesi úshin qyzmet etýge shaqyrdy.

Óz kezeginde, májilis depýtaty Erlan Saırov elimizdegi saıası reformalardyń ózektiligi men mańyzdylyǵyna toqtaldy.

– Árbir qazaqstandyq daýys berý jáne saılaný quqyǵyn qoldana alýy tıis. Demokratıaǵa, pikirler plúralızmine balama joq. Bul búginde birden-bir saıası progres jáne ulttyq túleý joly, – dedi ol.

«Qazirgi tańda birlikke shaqyrý popýlızm emes, qajettilik». Bul – mıtıńte sóz alǵan depýtat Aıdos Sarymnyń pikiri. Májilismen barlyq qoǵamdyq-saıası kúshterdi áriptestikke, birge jumys isteýge, jańa Qazaqstandy birge qurýǵa úndedi.

Halyqaralyq «Qazaq tili» qoǵamynyń vıse-prezıdenti Maksım Rojın qazirgi tańda qazaq tilin meńgergen ózge ult ókilderiniń, ásirese, jastardyń sany arta túskenin zor maqtanyshpen jetkizdi.

– Meniń týǵan elim – Qazaqstan. Men, táýelsiz elimizdi órkendetý jolynda partıalastarmen birge úles qosýǵa qashan da daıynmyn. Bizdiń basty qundylyǵymyz – birligimiz. Sondyqtan bárimiz birge elimizdi, jerimizdi, tilimizdi, dilimizdi, ulttyq qundylyqtarymyzdy saqtaý úshin aıanyp qalmaıyq, – dedi ol.

Al májilis depýtaty Saıasat Nurbek depýtat retinde ózine qarıa kisiniń búgin ǵana aıtqan bes amanatyn jetkizdi. Olar: memleket, prezıdent, el men jer, partıa jáne jastar. Ol memleketimizdi, prezıdentimizdi, elimiz ben jerimizdi saqtap, jastarymyzdy jaqsy isterge jumyldyrý, osy baǵyttaǵy memleket basshysynyń reformalaryn júzege asyrýǵa daıyn bolýǵa shaqyrdy.

Sondaı-aq, mıtıńte májilis depýtattary Janarbek Áshimjan, Dınara Zákıeva, qalalyq máslıhat hatshysy Stanıslav Kankýrov, jýrnalıs Sergeı Ponomarev, kásipker Larıon Lán, kópbalaly ana Sana Jandaı, ánshi Ibragım Eskendir jáne basqalar sóz sóıledi.