Aqmola oblysy Selınograd aýdany Qoıandy aýylynda ekinshi ulynyń qolynda turatyn Kamatan Toqtamuratqyzy kenshe balasy, 2021 jylǵy shildede Qytaı polısıasy tutqyndap alyp ketken Ǵarapa Nasıollaulynan 8 aıdan beri habar ala almaı júr.

Ǵarapa Nasıollauly Qytaıdaǵy Shyńjań ólkesine tanymal ánshi, kompozıtor. Mamandyǵy ádebıetshi muǵalim.

Kamatan Toqtamuratqyzy uly 2018 jyldyń qyrkúıek aıynan beri Gýań duń ólkesiniń Jıań mıń qalasyndaǵy Shynjań klasynyń tárbıeshisi bolyp qyzmet atqarǵanyn, byltyrǵy shilde aıynan beri segiz aıdan astam ýaqyt boıy uly týraly eshqandaı habar almaǵanyn aıtady.

Balasyn qaıda áketkeni, ne kúıde ekeni, qaıda qamalǵany, nendeı úkim shyqqany bylaı tursyn, eshkim kórmegen, eshkim bilmeıdi.

KazUnite.com saıtynyń málimetinshi, Ǵarapa Nasıollauly Beıjińdegi Ulttar ýnıversıtetiniń Qazaq tili jáne ádebıeti fakúltetin támámdap, 2012 jyldan beri Sanjy qalasyndaǵy oblystyq №2 orta mektebiniń ádebıet páninen sabaq bergen. 2018 jyldyń qyrkúıeginde bılik ony Qytaıdyń Gýań duń (Guang dong) dep atalatyn ishki ólkesindegi Jıańmyn (Jiangmen) qalasyna jiberedi. Sonda Shyńjańdaǵy az sandy ulttardyń úzdik oqýshylaryn jınap alyp, qytaısha oqytyp, tárbıeleıtin mektepke tárbıeshi-ustaz etip jiberedi.

Bala jastan óleń, án jazatyn Ǵarapa Nasıollauly WeChat áleýmettik jelisinde Suley degen atpen blog júrgizgen. Onda ádebıet, tarıh, mádenıet, mýzyka taqyrybynda jazbalardy jarıalap otyrǵan. Ol jerde qazaqtyń ulttyq óneri men ádebıeti ǵana emes, Qytaıdyń klasıkalyq ádebıeti jaıynda da jazylyp turǵan. Ǵarapa ol blogynda 2400-den asa shyǵarma jarıalaǵan. Sonymen birge eki ret qazaq kompozıtorlary men ánshileri qatysqan iri kólemdi án baıqaýyn, bir ret aqyndardyń jyr músháırasyn ótkizgen. Biraq olardyń eshqandaı da saıası maqsaty da, maǵynasy da bolmaǵan.

Basylym Ǵarapa Nasıollaulynyń ústinen 3 is qaralyp jatqanyn jazdy. Sonyń ishindegi eń aýyr is boıynsha 3-5 jylǵa bas bostandyǵynan aıyrylýy múmkin. Qalǵan eki is boıynsha qandaı shara qoldanylatyny ázirge belgisiz. Bul qandaı ister ekeni de ashylyp aıtylmaǵan.