Búgin QR Mádenıet jáne sport mınıstri Dáýren Abaevtyń tóraǵalyǵymen ótken Qazaqstan Respýblıkasy Úkimetiniń janyndaǵy respýblıkalyq onomastıka komısıasynyń otyrysynda komısıa músheleri Qapshaǵaı qalasyn Qonaev qalasy dep qaıta ataý týraly usynysqa oń qorytyndy berdi. Bul týraly mádenıet jáne sport mınıstrligi málim etti.
Jaqyn arada komısıanyń qorytyndysy daıyndalyp, zańnamaǵa sáıkes jumys júrgizý úshin Almaty oblysynyń ákimdigine joldanatynyn habarlandy.
Mınıstrlik málimetinshe, Qapshaǵaı qalasyn qaıta ataý týraly bastamany Almaty oblysynyń birqatar úkimettik emes uıymdary usynǵan. Sodan keıin bul bastamany Qapshaǵaı qalasy máslıhatynyń depýtattary biraýyzdan qoldap, Almaty oblysynyń onomastıkalyq komısıasyna joldaǵan.
Prezıdent Q.Toqaev 16 naýryz kúngi joldaýynda Almaty oblysy ekige bólinip, jańadan Almaty jáne Jetisý oblystary qurylatynyn, Almaty oblysynyń ortalyǵy Qapshaǵaı qalasy, Jetisý oblysynyń ortalyǵy Taldyqorǵan qalasy bolatynyn málim etip, qoǵam tarapynan Qapshaǵaı qalasyn Qonaev dep ózgertý usynysy tússe, usynysty qoldaıtynyn jetkizgen.
Qǵamda bastamany qoldaýshylarmen qatar, oǵan qarsy shyǵýshylar da barshylyq. Qoldaýshylar Qapshaǵaıdyń qala retindegi qalyptasýyna Dinmuhamed Qonaevtyń eńbegi zor ekenin eskerip, bastama oń dese, qarsy taraptaǵylar qurmet kórsetýdiń ózge de túri kóp, qalanyń tarıhı ataýy qalǵany durys deıdi.
Pikir qaldyrý