Buryn Qaraǵandy farmasevtıka klasterine berilgen "Fıtohımıa" ǵylymı-óndiristik kesheni memleket menshigine qaıtarylady. Bul týraly Bilim jáne ǵylym mınıstri Asqat Aımaǵambetov málim etti.

"Instıtýttyń mańyzy men áleýeti zor. İshki aýdıt qyzmetiniń tekserý jumysy kelisimniń memleketke tıimsiz ekenin kórsetti, múliktik keshendi baǵalaýǵa, onyń quny men bólip tóleýge qatysty suraqtar týyndady. Sol sebepti memleket menshigine qaıtarý bastamasy kóterildi. Tıisti qujatqa qol qoıylyp, rásimder júrgizilip jatyr. Sonymen qatar Qaraǵandy qalasynyń saıabaq aımaǵyndaǵy jerlerdi qalanyń ortalyq saıabaǵynyń bir bóligi retinde memleket menshigine qaıtarý máselesi qarastyrylatyn bolady" dep jazdy mınıstr telegram paraqshasynda.

"Qaraǵandy farmasevtıka klasteriniń artynda olıgarh Qaırat Boranbaev tur" degen aqparat bar. Bıznesmen naýryz aıynan beri qamaýda otyr. Ol kvazımemlekettik sektorda iri kólemde qarjy jymqyrý kúdigi boıynsha tergelip jatyr. Qaırat Boranbaev 2022 jylǵy deıin eldegi eń baı 15 adamnyń qataryna kiretin. Qamaýda otyrýyna baılanysty Forbes Kazakhstan jýrnaly ony bıylǵy reıtingine qosqan joq. Ol "Qaırat" fýtbol klýby, Almatydaǵy Esentai Mall, Esentai Tower, "Almaly" saýda oıyn-saýyq keshenderi, "Rahat Palas" qonaqúıi ıeleriniń biri. McDonald’s Qazaqstan, Reseı franchaızıńiniń basshysy.

Boranbaevtyń eks-prezıdent N.Nazarbaevpen týystyq qarym-qatynasy da bolǵan. Qyzy Alıma Nazarbaevtyń 2020 jyly qaıtys bolǵan jıeni Aısultan Nazarbaevtyń áıeli bolǵan.