«AMANAT»-tyń atqarýshy hatshysy Asqat Oralov beınekonferensıa baılanysy arqyly partıanyń óńirlik fılıaldarymen azyq-túlik pen halyq tutynatyn taýarlar baǵasynyń qymbattaý máselesine qatysty keńes ótkizdi, dep habarlady
Osy aptadan bastap elimizdiń barlyq oblys jáne aýdandarynda 216 partıalyq monıtorıń jáne qadaǵalaý toby jumysqa kiristi. Olar saýda nysandaryn tekseredi jáne áleýmettik mańyzy bar ónimderdiń baǵasyna monıtorıń júrgizedi. Bul týraly «AMANAT» partıasynyń Atqarýshy hatshysy Asqat Oralov málimdedi.
Atap aıtqanda, ol eldegi ınflásıanyń jedel ósýine syrtqy faktorlardan basqa, saýda júıesindegi deldaldar men alypsatarlardyń aıtarlyqtaı kóbeıýi yqpal etkenine nazar aýdardy.
«14 shildede memleket basshysy Qasym-Jomart Toqaev Úkimettiń keńeıtilgen otyrysynda taýarlar baǵasyn turaqtandyrý jáne azamattardyń tabysyn arttyrý boıynsha naqty mindetterdi belgiledi. Degenmen, memlekettik organdar qabyldaǵan is-sharalar baǵanyń ósýin tejeýge tolyq kólemde yqpal etpeıdi. Baǵany jón-josyqsyz kóteretin satýshylar tekserý ýaqytyn aldyn ala bilip otyrady jáne olar memlekettik organdar tekserýshileriniń túrin tanıdy», dedi atqarýshy hatshy.
Ulttyq statısıka búrosynyń derekterine súıensek, maýsym aıynda jyldyq ınflásıa 14,5%-dy qurady. Bir jyl ishinde eń kóp qymbattaǵan – azyq-túlik taýarlary (17,9%). Azyq-túlik emes taýarlardyń baǵasy 11,1%-ǵa, aqyly qyzmetterdiń baǵasy 8,9%-ǵa ósti.
«Qoǵamdyq saıasat ınstıtýtynyń áleýmettik zertteýine sáıkes, qazaqstandyqtardyń 80%-dan astamy baǵanyń ósýine alańdaıdy. Bul másele ásirese, áleýmettik osal toptar úshin óte ózekti. Biz osy jaǵdaıdy partıanyń barlyq óńirdegi qoǵamdyq qabyldaý bólmelerine kelip túsken ótinishterdiń artýynan baıqap otyrmyz. Máselen, jyl basynan beri áleýmettik qamsyzdandyrý máselelerimen júgingenderdiń úlesi 30%-ǵa ósti. Osyǵan baılanysty biz jergilikti jerdegi naqty jaǵdaıdy anyqtaý úshin azyq-túlik pen taýarlar baǵasyna monıtorıń júrgizetin 216 arnaıy top qurdyq. Qazirdiń ózinde dúken sórelerindegi baǵalar men memlekettik organdardyń esepteri bir-birine sáıkes kelmeıdi deýge bolady», dep atap ótti Asqat Oralov.
Atqarýshy hatshy monıtorıń tobyna tek partıalyqtar ǵana emes, sondaı-aq qoǵam belsendileri, úkimettik emes uıymdardyń ókilderi, bıznesmender, jýrnalıser men táýelsiz sarapshylar da kiretinin aıtty. Jumys nátıjeleri Parlament Májilisinde jáne Úkimette qaralady.
Aımaqtardaǵy qazirgi jaǵdaı týraly Májilis depýtaty, partıa janyndaǵy Agroónerkásiptik komıtet tóraǵasy Qaınar Abasov jáne Májilis depýtaty, partıa janyndaǵy Ekonomıka, kásipkerlik jáne agrarlyq sektor máseleleri jónindegi respýblıkalyq keńestiń múshesi Ǵalym Ámireev, Shyǵys Qazaqstan oblysyndaǵy jaǵdaı týraly monıtorıń tobynyń múshesi, Óskemen qalalyq máslıhatynyń depýtaty Zoıa Novolodskaıa aıtyp berdi.
«Kesheden beri óńirde 84 saýda nysanyna monıtorıń júrgizildi. Júrgizilgen taldaý nátıjesinde ákelinetin kókónisterdiń (kartop, sábiz, pıaz, qyryqqabat) baǵasyn 19%-ǵa kóterý faktisi anyqtaldy. Monıtorıń kezinde kásipkerler satyp alý baǵasyn kórsetetin qujattaryn usyna almady. Túsindirý jumystary júrgizilip, atalǵan nysandar partıalyq baqylaýǵa alyndy», - dedi ol.
Sondaı-aq, jıyn barysynda Nur-sultan qalasy boıynsha ekonomıka jáne kásipkerlik máseleleri jónindegi Qoǵamdyq keńestiń tóraǵasy Bolat Omarov sóz aldy.
«Elordada kartop – 10872 tonna (65%), sábiz – 2938 tonna (76%), qyryqqabat – 1900 tonna (49%), pıaz – 2695 tonna (107%) sıaqty áleýmettik mańyzy bar azyq-túlik taýarlarynyń bes aı tutynýǵa bolatyn 30% qory jasaldy. Birinshi surypty unnan jasalǵan nan baǵasyn turaqtandyrý úshin memorandým aıasynda elordanyń óńdeý kásiporyndaryna astyq jiberilýde», – dedi ol.
«AMANAT»-tyń Túrkistan oblystyq fılıalynyń atqarýshy hatshysy Beısenbaı Tájibaevtyń aıtýynsha, óńirde 18 partıalyq monıtorıń toby qurylǵan.
«28 shildede atalǵan toptar oblystyń 88 bazary men iri saýda nysandaryn aralady. Baǵanyń ósýin tejeý úshin oblysta turaqty túrde aýyl sharýashylyǵy jármeńkeleri uıymdastyrylady, baǵanyń negizsiz ósýine jol bermeý boıynsha iri saýda uıymdarymen memorandýmdar jasalady. Biz qazirdiń ózinde 1467 úı mańyndaǵy dúkenderdiń 1463-in (99,7%) tekserdik, baǵany negizsiz kóterýdiń 38 faktisi anyqtaldy. Tıisti sharalar qabyldaý arqyly baǵalar 10-15%-ǵa tómendedi», - dep atap ótti ol.
«AMANAT» partıasynda monıtorıń júrgizetin toptar kún saıyn jumys isteıtini aıtyldy. Aımaqtardaǵy áleýmettik mańyzy bar azyq-túlik baǵasynyń ózgergenine qatysty málimettiń mán-jaıy Partıalyq baqylaý komısıasynyń otyrysynda qaralady. Ózgeris anyqtalǵan jaǵdaıda máseleni sheshý úshin usynymdar ázirlenip, naqty merzimi men jaýapty tulǵalar belgilenedi.
«AMANAT» partıasynyń baspasóz qyzmeti
Pikir qaldyrý