Búgin Májilis depýtattary Mádı Elúbaev pen Iýlıa Kýchınskaıa Aqmola oblysynyń Arshaly aýdanyna qarasty «Jibek joly» aýylyndaǵy 300 orynǵa shaqtalǵan mekteptiń qurylys barysymen tanysty.

Bul bilim berý nysany «AMANAT»  partıasynyń saılaýaldy baǵdarlamasyn oryndaýdyń Jol kartasyn iske asyrý aıasynda qolǵa alynǵan. Sondyqtan onyń sapaly ári óz ýaqytynda aıaqtalýy partıa baqylaýynda. Mekteptiń qurylysy 2020 jyly bastalyp, bıylǵy oqý jylynyń basynda, ıaǵnı qyrkúıekte tapsyrylýy kerek bolatyn.

Merdigerdiń aıtýynsha, qurylys materıaldarynyń qymbattaýy saldarynan jobalyq-smetalyq qujatty qaıta túzetý qajet bolǵan. Bul óz kezeginde qurylystyń kesheýildeýine sebep deıdi.

Májilis depýtaty Iýlıa Kýchınskaıanyń pikirinshe, máseleniń túpki sebepteri memlekettik satyp alý týraly zańynyń shıkiliginen bolyp otyr.

«Biz partıanyń saılaýaldy baǵdarlamasy aıasynda qolǵa alynǵan qurylys nysandaryna monıtorıń júrgizý barysynda memlekettik satyp alý týraly zańynyń shıkiliginen týyndaǵan birshama olqylyqtardy baıqadyq. Sondyqtan biz tek monıtorıń júrgizip, nysandy ýaqytynda tapsyrmaǵan merdigerdi jazalaýdy maqsat tutpaımyz. Negizgi maqsatymyz zańdardy jetildirý. Qandaı zańda nendeı olqylyqtaryn baryn anyqtaýǵa tyrysyp otyramyz. Máselen, búginde «Memlekettik satyp alý týraly» zańnyń jetilmegendigin baıqadyq. Odan qaldy qurylys nysandaryn salýdy josparlaý júıesi de jetilmegen. Olaı deıtinim, merdigermen áńgimelesý barysynda jobalyq-smetalyq qujattamanyń áýelde-aq sapasyz ázirlengenin, geologıalyq barlaýmen baılanysty problemalar anyqtalǵanyn bildik. Kelesi sesıadaǵy jumys aıasynda biz osy máselelerdi kóteretin bolamyz.  «Memlekettik satyp alý» týraly zańdy jetildirý boıynsha Memleket basshysy birneshe ret tapsyrma berdi. Bul taqyryp depýtattardyń aınalysatyn negizgi baǵyttarynyń biri», – dedi Iýlıa Kýchınskaıa.

Óz kezeginde, qurylys nysanynyń bas merdigeri «Dostar» kópsalaly kompanıasynyń ókili Aslan Nabıev bolsa, mektepti jeltoqsan aıynda aıaqtaýǵa tyrysamyz dep otyr.

Májilis depýtaty Mádı Elúbaev atalǵan mekteptiń qurylysy «Jibek joly» aýylyndaǵy úsh aýysymda oqý máselesin birshama sheshýge kómektesetinin alǵa tartty. Depýtattardyń aıtýynsha, elorda mańyndaǵy eldi-mekenderdegi eń negizgi problema turǵyndarynyń kóbi aýylda resmı tirkelmegendiginen týyndap otyr. Máselen, «Jibek joly» aýylyndaǵy jergilikti halyqtyń sany resmı derek boıynsha 10 myńnyń aınalasynda bolsa, túptep kelgende, turǵyndar odan eki ese kóp.

Bul óz kezeginde elorda aınalasyndaǵy aýyldarda áleýmettik ınfraqurylymdardyń jetispeýshiligine alyp kelýde. Sondyqtan, halyq qalaýlylary aldaǵy ýaqytta aglomerasıalardy damytý týraly zańdy jetildirý qajet dep sanaıdy.

Jalpy,  Jibek joly aýyldyq okrýginde búginde bir emes, eki mekteptiń qurylysy júrýde. Ekeýi de 300 orynǵa shaqtalǵan. Májilis depýtattary «Jibek joly» aýylyndaǵy mekteptiń qurylysy baıaý júrgendigin anyqtap, onyń jyldyń sońyna deıin jyldam ári, sapaly oryndalýyn baqylaýda ustaıtyndaryn aıtty. 

Májilistiń baspasóz qyzmeti