Prezıdent Qasym-Jomart Toqaev 1 qyrkúıekte Parlament palatalarynyń birlesken otyrysynda Qazaqstan halqyna Joldaýyn jarıalaıdy. Bul týraly Aqordanyń baspasóz qyzmeti habarlady.

Bul joldaý prezıdenttiń osy jylǵy ekinshi joldaýy bolmaq. Toqaev alǵashqy joldaýyn 16 naýryzda jarıalaǵan. Qujat negizinen sýperprezdenttik júıeden bas tartýǵa arnalǵan bastamalardan turdy. Atap aıtqanda prezıdenttiń partıaǵa múshe bolýyna zań júzinde tyıym salý, ortalyq saılaý komısıasy tóraǵasy men músheleri, esep komıteti, konstıtýsıalyq keńes múshelerin partıa quramynan shyǵarý, ákimderge partıa fılıaldaryn basqarýǵa tyıym salý, prezıdenttiń jaqyn týystaryna saıası laýazymdar men kvazımemlekettik qurylymdardy basqarýǵa tyıym salý, májilistiń 70 paıyzyn proporsıonaldyq (partıalyq tizim), 30 paıyzyn majorıtarlyq júıe (ózin-ózi usyný) boıynsha jasaqtaý sıaqty máseleler kóterilgen. Prezıdent tapsyrmasyn júzege asyrý aıasynda jalpyhalyqtyq referendým ótip, onyń qorytyndysy boıynsha Konstıtýsıasynyń 33-babyna 56 ózgeris engizý maquldanǵan.

Bılik ózgerister paketine "Jańa Qazaqstandy" qurýǵa baǵyttalǵan saıası reforma, prezıdenttiń quzyretin shektep, parlamentti kúsheıtetin qadam degen mazmunda baǵa bergen. Alaıda mundaı málimdemelerge qarsy ýáj aıtqan sarapshylar da az emes. Tipti qabyldanǵan ózgeristerde prezıdent quzyretin shekteıtin baptar kóp emestigin, basym fýnksıasy ózgerissiz qalyp, tipti keı tusta kúsheıetinin ańǵarýǵa bolady.

Máselen, 44-baptyń 4-tarmaǵyna saı, prezıdent senat kelisimin alyp, Konstıtýsıalyq sottyń tóraǵasyn, Ulttyq ban­k, Joǵary sot keńesiniń tóraǵalaryn, Bas prokýrordy, Ulttyq qaýipsizdik komı­tetiniń tóraǵasyn taǵaıyndaý, ornynan alý quzyretin ıelenedi. Atalǵan tarmaqtyń burynǵy redaksıasynda prezıdentte Konstıtýsıalyq sot (burynǵy keńes - red) pen Joǵary sot keńesiniń tóraǵasyn taǵaıyndaý, ornynan alý quzyreti bolmaǵan.