Bıylǵy jylǵy Joldaýdyń osyǵan deıingi joldaýlardan ózgesheligi – halyqtyń shyn máninde «Jańa Qazaqstandy» qurý jolynda memleket tarapynan el bolyp tereń áleýmettik-ekonomıkalyq reformalar men naqty is-qımyldarǵa baǵyttalǵan bastamalardy asyǵa kútýi dep aıtýǵa bolady. Qazirgi álemde qalyptasqan kúrdeli geosaıası jaǵdaıda el eshinde tynyshtyqty saqtaý, ekonomıkalyq ósimdi únemi qamtamasyz etý men áleýmettik qamsyzdandyrýdy esten shyǵarmaý turaqty damý kepili bolyp tabylatyny sózsiz. Prezıdent bul jolǵy óziniń Joldaýynda reformalardyń naqty baǵyttaryn anyqtaý úshin eń aldymen jańa ekonomıkalyq saıasatty qurýdan bastaýy sondyqtan bolar.

Prezıdent sózimen aıtar bolsaq, búgingi kúni el ekonomıkasyn damýyn tejep otyrǵan júıeli problemalar mynalar: shıkizat ónimine táýeldilik, eńbek óniminiń tómengi deńgeıi, ınovasıalyq damý deńgeıiniń kóńilden shyqpaýy, tabystyń tıimsiz bólinýi. Memleket basshysy Q.K. Toqaev Joldaýda ulttyq ekonomıka damýyna kedergi jasaıtyn osy syndy búgingi kúnniń problemalaryn sheshýdiń mynandaı naqty joldaryn usyndy, olar: «Makroekonomıkalyq turaqtylyq, ekonomıkany dıversıfıkasıalaý, sıfrovızasıa, shaǵyn jáne orta bıznesti, adam kapıtalyn damytý, zań ústemdigin qamtamasyz etý».

Qazirgi ýaqytta álemniń úzdik damyǵan memleketteriniń tájirıbesi kórsetip otyrǵandaı ulttyq ekonomıkany damytý zamanaýı ınovasıalyq tehnologıalardy ıgerý men belsendi endirýdi talap etedi. Qoǵamdyq ómirdiń barlyq salalaryn sıfrlandyrý men avtomattandyrý salyqtan túsken tabystyń ashyq ári adal túrde iske asýyn qamtamasyz etetini anyq. Sonymen birge aldyńǵy qatarly ozyq ınovasıalyq tehnologıalar jalpy kásiporyndardyń básekege qabilettiligin arttyryp qana qoımaı, el turǵyndarynyń ómir súrý sapasyn jaqsartý úshin de qajet. Bul birinshi kezekte sıfrly órkenıet zamanynda adam kapıtalynyń damýymen tyǵyz baılanysty. Shyn máninde búgingi kúni ǵalamtorǵa qoljetimdiliktiń ósýi saıası aqparat aǵynyn arttyryp, azamattardyń bilim men jańa zaman talabyna saı kásibı sheberlikterdi jappaı ıgerýine jol ashty.

Zamanaýı komýnıkasıalyq quraldardyń qoǵamdyq ómirge jyldam qarqynmen enýiniń taǵy bir basym tusy retinde azamattarymyz úshin áleýmettik-saıası prosester jaıly aqparattar aǵynyn eselep ósýi, azamattyq qoǵam ınstıtýtarynyń rólin arttýyn aıtýǵa bolady. Osyǵan oraı qazaqstandyq qoǵamnyń jańa saıası mádenıeti jahandaný prosesi jaǵdaıynda qalyptasýdy bastan ótkerýde. Oǵan aıqyn mysal retinde sońǵy jyldary qoǵamda oryn alǵan ártúrli problemalar men ózgeristerge azamattardyń beıjaı, nemquraıly qaramaıtyndyǵyn jáne oǵan óz tarapynan baǵa bere alatyndyǵyn kórsetti. Atap aıtqanda, ústimizdegi jyly bolǵan túrli saıası oqıǵalarǵa, memleket tarapynan kóterilgen jańarýlarǵa, referendýmǵa belsene qatysýy qoǵamnyń saıası belsendiliginiń artyp otyrǵandyǵyn kórýimizge bolady. Osy oraıda áleýmettik-saıası prosesterge qazaqstandyq qoǵamnyń belsendi atsalysýynda zamanaýı aqparattyq-kommýnıkasıalyq tehnologıalardyń yqpalyn joqqa shyǵara almaımyz.

Árbir úshinshi azamat «jastar» kategorıasyna enetin Qazaqstan úshin zamanaýı aqparttyq-kommýnıkasıalyq tehnologıalardy jastar arasynda qoldanysy ǵylymı turǵyda zerttelýi tıisti mańyzdy taqyrypqa aılanyp otyr. Sebebi zamanaýı sıfrly tehnologıalar eldiń árbir azamatynyń kúndelikti ómiriniń ajyramas bóligine aınalyp úlgerdi, olar kún ótken saıyn bizdiń ómirimizdiń ár túrli salalaryn kóbirek qamtyp keledi. Atap aıtqanda, qazaqstandyq jastar zamanaýı sıfrly tehnologıalardy jyldam ıgerý ústinde jáne atalmysh jahandyq úrdistiń barlyq ıgilikterin qoldanýǵa múmkindik aldy. Oǵan qosa sońǵy jyldary búkil álemde oryn alǵan pandemıa saldary jastardyń zamanaýı tehnologıalardy qoldaný aıasynyń keńeıýi men ǵalamtordyń olarǵa tıgizetin yqpalynyń odan ári artýyna septigin tıgizýde.

Núrken Aıtymbetov,

QR ǴJBM ǴK Fılosofıa, saıasattaný jáne dintaný ınstıtýtynyń jetekshi ǵylymı qyzmetkeri