Fransıanyń ártúrli qalalarynda on myńdaǵan adam jalaqyny kóterý jáne zeınet jasyn ulǵaıtý josparynan bas tartýdy talap etip demonstrasıaǵa shyqty, dep jazady Deutsche Welle basylymy.

Fransıanyń eń iri kásipodaq uıymy – jalpy eńbek konfederasıasynyń (CGT) málimetinshe, búkil el boıynsha ótken 200-ge jýyq ereýilge 250 myńnan astam adam qatysqan. Fransıanyń İshki ister mınıstrligi 179 mıtıńke 118 500 demonstrant qatysqanyn habarlap otyr.

Narazylyq aksıasyn uıymdastyrǵandar el astanasy Parıjde narazylyq bildirýshiler sany 40 myńǵa jýyq bolǵanyn aıtsa, polısıa olardyń sanyn 13500-ge jetti deıdi. Bilim mınıstrliginiń málimetinshe, ereýilderge pedagogtardyń shamamen 11 paıyzy qatysqan. 

Bir kún buryn Fransıa úkimeti zeınetaqy reformasy týraly konsýltasıalardy uzartýǵa kelisken. Jańa zań 2023 jyldyń jazynda kúshine enýi kerek. Oǵan saı, zeınet jasy 2031 jylǵa qaraı birtindep 65 jasqa deıin ósedi. Qazir Fransıa turǵyndary zeınetke 62 jasynda shyǵady.