Ortalyq saılaý komısıasynyń qaýlysyna saı, Qazaqstan halyq partıasy atynan saılanǵan májilis depýtaty Aıbek Paıaevtiń ókileti toqtatyldy.

Qaýlyda ókilet Paıaevtiń ótinishi boıynsha toqtatylǵany aıtylady.

Alaıda jelide muny eks-depýtattyń bir aı buryn reseılikter shekarany zańsyz kesip ótip jatqanda aıtqan "zań buzǵan sheteldik azamattardy birden deportasıalaý kerek" degen málimdemesimen baılanystyryp jatqandar bar.

"Ketti emes, ketirdi, jazdy emes, jazǵyzdy" deıdi kópshilik jurt.

Baı-baqýatty adamdardy, bıliktegi sheneýnikterdi "baqytty adam" dep esepteıtin ázil-shyny aralas jazbalarymen belgili saıasattanýshy Samat Nurtaza máselege baılanysty "ár adam óz baqytyny/sorynyń avtory dep beker aıtpaıdy" dep málimdeme Paıaevtiń jyly ornyn bosatýyna sebep boldy degenge meńzeıdi.

Eks-depýtattyń ózi jaǵdaıdy otbasylyq máselerge baılanysty Qazaqstan halyq partıasy qatarynan shyqqanyn, partıadan shyqqanda májilistegi ókilet avtomatty túrde toqtatylatynyn aıtyp túsindirgen. Bolashaqta memlekettik qyzmetke oralýǵa, depýtat bolýǵa qarsy emestigin de atap ótken.

Osy jerde joǵaryda aıtqan saıasattanýshy Samat Nurtazanyń "bılikti ádette memlekettik qyzmette isteýdi josparlamaıtyndar, memqyzmetten kúderi úzilgender jıi synaıdy, al memqyzmette istep qalýy yqtımal adamdar áleýmettik jelide tilin tistep júredi" degenge saıatyn sózi eske túsedi.