Bıshi, pedagog, baletmeıster, Qazaqstannyń halyq ártisi, Qazaqstan Memlekettik syılyǵynyń laýreaty Bolat Aıýhanov 86 jasqa qaraǵan shaǵynda ómirden ótti.

Bolat Aıýhanov 1938 jyly 13 qyrkúıekte Semeı qalasynda dúnıege kelgen. Almaty horeografıalyq ýchılıshesin A.Seleznevtiń klasy boıynsha, Sankt-Peterbordaǵy A.Vaganova atyndaǵy bı akademıasyn, GITIS-tiń baletmeısterlik bólimin támámdaǵan.

1957-1959 jyldary Qazaq opera jáne balet teatrynyń bıshisi bolǵan. 1967 jyly «Qazaqkonsert» janyndaǵy «Almatynyń jas baleti» ansamblin qurǵan. Sol jyldan bastap osy ansámblde bıler men horeografıalyq mınıatúralardy, kompozısıalardy («Aqqý», «Aıtys», «Ańshylar bıi», «Jaıdarman»), bir, eki aktyly baletterdi (M.Raveldiń «Bolerosy», V.Býlgarovskııdiń «Qazaq sývenıri», A.Isakovanyń «Gamlet», «Jarys», «Batyrlary», T.Qajyǵalıevtiń «Kerýeni», N.Zakırovtyń «Máńgúrti», Bıze-SHedrınniń «Karmen-súıtasy») sahnaǵa qoıǵan.

1975 jyldan bastap Qazaqstan klasıkalyq bı ansambliniń kórkemdik jetekshisi, balet solısi, 1976 jyldan Qazaqstan klasıkalyq bı ansambliniń kórkemdik jetekshisi, dırektory bolǵan. 1991 jyldan bastap Qazaq memlekettik klasıkalyq bı ansambliniń kórkemdik jetekshisi bolyp, 2003 jyldan beri QR Memlekettik akademıalyq bı teatrynyń dırektory qyzmetin atqarǵan.

Sondaı-aq E.Brýsılovskııdiń «Qyz Jibek» (Sh.Jıenqulovamen birge), D.Shostakovıchtiń 4-shi sımfonıasy boıynsha «Qylmys pen jaza», P.Chaıkovskıı men M.Pletnevtiń «Evgenıı Onegın», F.Shopenniń «Shopenıana», «Pahıta» baleti negizinde qoıylǵan gran pa (jeke óziniń horeografıalyq boljamdary) tárizdi jumystary qazaq baletiniń ǵana emes, dúnıejúzilik balet tarıhyna engen jańalyqtar retinde baǵalanǵan.

Otyz jyldan astam Aıýhanov jetekshilik etken ansámbl horeografıalyq ónerdi ıgerýi jóninen álemdik balet ujymdarynyń eń úzdigi sanalatyn alǵashqy ondyǵyna engen. Onyń «Meniń baletim», «Sezimder ómirbaıany» atty kitaptary bar. Eýropa mádenıetiniń HH ǵasyrdaǵy 60 jaryq juldyzy týraly shyǵatyn 25 kitaptyń bireýi Aıýhanovtyń ómiri men ónerine arnalǵan (avtory avstralıalyq óner zertteýshisi Iýrı Rúntú). 

"Bolero", "Qazaq sývenıri", "Batyrlar", "Qyz Jibek", "Gamlet", "Karmen-súıta", "Shyńǵysqan" jáne basqa qoıylymdarǵa qatysqan. "Bizdiń jerimizdiń baılyǵy", "Jaýym, toǵyzynshy uldan qoryq", "Túnektiń ámirshisi", "Aıdaı sulý Aısulý ertegisi týraly" kınofılmderine túsken.

«Qurmet belgisi», «Eńbek Qyzyl Tý» ordenderimen marapattalǵan.