Túrkıadaǵy Afon qalasynda bilim alyp jatqan qazaqstandyq stýdent Tasnım Nyǵmetýla joıqyn jer silkinisinen keıin jergilikti halyqtyń kóbi qoryqqannan úıine kire almaı júrgenin aıtty. 

"Keshegi tún biz úshin óte aýyr boldy. Jer silkinisi bolýy múmkin degen dabyl qaǵyldy. Túnimiz qorqynyshpen, úreımen ótti. Bárimiz dalaǵa shyǵyp kettik. Túni boıy 1 qabatty kafelerde qondyq. Ázirge bári tynysh", deıdi qazaqstandyq stýdent. 

Onyń aıtýynsha, Túrkıadaǵy ákimshilik qyzmetkerleri "túnimen uıqtamańyzdar, saqtanyp otyryńyzdar" dep eskertken. 

"Basqa qalalarda jaǵdaı óte aýyr. Al biz turatyn jerde zilzala bolmady. Tek eskertý jasaldy. Ákimshilik qyzmetkerleri "túnimen uıyqtamańyzdar, saqtanyp otyryńyzdar", dedi. Ózimiz kerek-jaraǵymyzdy daıyndap, jınap qoıdyq. Keshe aıaq astynan kún sýytyp, boran boldy. Halyqtyń kóbi qorqyp, dalada júrdi", deıdi Tasmın Nyǵmetýla. 

Qazaqstandyq stýdent Qazaqstanǵa oralýdy oılap otyrǵanyn jetkizdi, alaıda ázirge naqty sheshim qabyldamaǵan. Jaǵdaı turaqtalsa oqýyn jalǵastyrýdy josparlap otyr.

Túrkıanyń ońtústigi men Sırıanyń soltistiginde bolǵan qýatty zilzala qurbandary sát saıyn artyp jatyr. Sońǵy derekke saı, jer silkinisinen Túrkıada 3400-den asa adam qaza tapqan. 20426 adam jaraqat alyp, 7840 adam úıindi astynan qutqarylǵan. Sırıada 1602 adam mert bolǵan. Túrkıanyń birneshe qalalarynda jer silkinisi qaıtalanýy múmkin ekenin jóninde eskertý dabyly qaǵylǵan. Qutqarý jumystary jalǵasyp jatyr.