Halyqaralyq eńbek uıymynyń «2022-2023 jyldarǵa arnalǵan jahandyq jalaqy týraly esep» baıandamasyna sáıkes, 2006-2019 jyldar aralyǵynda álemde naqty aılyq jalaqynyń ortasha jyldyq ósimi (ınflásıany eskere otyryp, satyp alý qabiletiniń ózgerýi) 2%-dy quraǵan. 2020 jylǵy «koronadaǵdarys» kezinde ósim 2019 jylǵy «koronadaǵdarys» aldyndaǵy ýaqytqa (2%) qaraǵanda 1,5%-ǵa deıin tómendese, 2021 jyly 1,8% deıin ósken, dep habarlady Ranking.kz portaly.

Bul rette 2022 jyldyń birinshi jartyjyldyǵynda 2021 jyldyń sáıkes kezeńimen salystyrǵanda ortasha álemdik naqty jalaqy 0,9%-ǵa tómendegen. Bul 2021 jyly bastalyp, 2022 jyly jalǵasqan ınflásıanyń ósýimen baılanysty. Jalaqy dástúrli túrde joǵary bolatyn Qytaıdy qospaǵanda, qysqarý 1,4%-dy qurady.

Álemniń eń iri 20 ulttyq ekonomıkasy kiretin G20 elderindegi jalaqynyń satyp alý qabileti 2022 jyldyń birinshi jartyjyldyǵynda álemdik ortasha kórsetkishpen birdeı 0,9% tómendedi. Bul rette EO elderinde jáne Ulybrıtanıada kórsetkish 2,2%, Ulybrıtanıany qospaǵanda EO elderinde 2,4% tómendedi.

Aımaqtar boıynsha 2022 jyldyń birinshi jartyjyldyǵynda naqty jalaqynyń eń úlken jyldyq ósimi Ortalyq jáne Batys Azıada baıqaldy: 2,5%. Odan keıingi orynda Azıa-Tynyq muhıty aımaǵy: 1,3% (Qytaıdy eseptemegende, ósim nebári 0,7%). Oń kórsetkish arab memleketterinde de baıqaldy: 1,2%.

Basqa aımaqtarda jalaqy naqty mánde tómendedi, eń aldymen Shyǵys Eýropada: 3,3% azaıdy. Odan keıin Soltústik Amerıkada ınflásıa satyp alý qabiletiniń tómendeýine áser etti, sondaı-aq pandemıadan keıin tómen jalaqy alatyn jumysshylar naryqqa oraldy, nátıjesinde naqty jalaqy 3,2% tómendedi. Soltústik, Ońtústik jáne Batys Eýropa elderinde naqty jalaqynyń tómendeýine eń aldymen ınflásıanyń ósýi áser etti, atap aıtqanda jalaqynyń satyp alý qabileti 1,9% tómendedi. Latyn Amerıkasy men Karıb baseıninde 1,7%, Afrıkada 0,5% tómendedi.

Qazaqstanda byltyr ınflásıa deńgeıi 20,3 paıyzǵa jetkenin eskersek, azamattardyń jalaqysy 20 paıyzǵa qunsyzdanǵan bolyp otyr.