Ýkraına syrtqy ister mınıstrligi TMD lıderleriniń Máskeýdegi paradqa barýyn "táýelsizdik úshin kúresip jatqan ýkraın halqyna qarsy dushpandyq qadam" dep atady.

Málimdemede parad kezinde Ýkraınaǵa qarsy soǵysqa qatysyp jatqan reseılik áskerı tehnıka kórsetilgeni aıtylǵan. Sonymen qatar, Vladımır Pýtınniń "ýkraınderdi óltirýdi, Ýkraınanyń qalalary men aýyldaryn talqandaýdy, bala urlaý men okýpasıalanǵan ýkraın aýmaqtary turǵyndaryna qarsy repressıany aqtaǵany" da jazylǵan.

"İs-sharanyń aldynda Reseı Ýkraınany odan saıyn qıratý úshin 25 qanatty zymyranyn ushyrdy" dedi olar. Bul týraly Azattyq radıosy jazdy.

Málimdeme avtorlary Ortalyq Azıa men Kavkaz halqy 78 jyl buryn nasızmdi jeńýge ólsheýsiz úles qosty dep jazǵan. Al osy elderdiń qazirgi basshylarynyń paradqa qatysýy "azattyǵy úshin kúresi jatqan ýkraın halqyna qarsy dushpandyq qadam" dep baǵalanǵan.

Eske sala keteıik, 9 mamyrda Máskeýdegi Qyzyl alańda Ekinshi dúnıejúzilik soǵystaǵy jeńistiń 78 jyldyǵyna oraı áskerı parad ótti. Sharaǵa Reseı prezıdenti Vladımır Pýtınmen birge Qazaqstan prezıdenti Qasym-Jomart Toqaev, Qyrǵyzstan, Tájikstan, Ózbekstan, Túrkimenstan prezıdentteri jáne Belarýs basshysy Aleksandr Lýkashenko men Armenıa premeri Nıkol Pashınán qatysqan.

Pýtın paradtaǵy sózinde "Batystaǵy globalıstik elıta Reseıge soǵys ashty" dep aıyptap, batys elıtasyn nasısterge teńegen. Reseı prezıdenti "Batys Reseıdiń qurdymǵa ketip, ydyraǵanyn qalaıdy" dedi.

Ol Sovet Odaǵynyń Ekinshi dúnıejúzilik soǵys kezindegi odaqtastaryn atap ótip, paradqa kelgen TMD elderiniń basshylaryna alǵys bildirdi.