Prezıdent "Onlaın-platformalar jáne onlaın-jarnama týraly" zańǵa qol qoıdy. Budan bylaı blogerler jalǵan aqparat taratqany úshin ákimshilik jaýapqa tartylady. Al jarnama jasaıtyndar jeke kásipker retinde tirkelýi shart.
Jańa zańnyń negizgi normalary
Toqaev qol qoıǵan zańda "onlaın-platforma paıdalanýshysy" jáne "ınflúenser (bloger)" degen uǵymdardyń anyqtamasy jazyldy. Sondaı-aq olardyń quqyqtary men mindetteri kórsetilgen.
Al onlaın-platforma ıeleri jalǵan aqparatpen kúres jáne salyqtan jaltarý boıynsha memlekettik organdarmen birlesip jumys isteýge mindetteledi. Ol úshin ınternet platformanyń zańdy ókili belgilenedi. Al platformanyń ózinde paıdalanýshylardyń sanyn anyqtaıtyn baǵdarlama ornatylady.
Zańǵa qaıshy kontent anyqtalǵan jaǵdaıda zańdy ókilge ol aqparatty joıýǵa habar beriledi. Talap oryndalmasa, quziretti organ onlaın-platformanyń qyzmetin shekteýge quqyly. Al adam ómirine qaýip tóndiretin kontent jarıalansa, onlaın-platformanyń zańdy ókili quqyq qorǵaý organdaryna habar berýge tıis. Balaǵa kıberbýllıng jasalǵan jaǵdaıda ondaı akkaýnttar buǵattalýy shart.
Sondaı-aq zańda onlaın-platformalardyń ınterfeısine memlekettik tildi ıntegrasıalaý mindeti engizildi. Sonda qazaq tilindegi kontent te qadaǵalanady.
Salyqtan qutyla almaıdy
Búginde jarnamanyń alpys paıyzy ınternette jarıalanady. Onyń kólemi trıllıondaǵan aqsha bolýy múmkin. Zań boıynsha ınternet arqyly tabys tabatyn blogerler endi salyq tóleýge mindetteledi.
"Sheteldiń maqaly bar: kez kelgen adam ólim men salyqtan qutyla almaıdy degen. Olaı bolsa, bizdiń zamandastarymyz da, jýrnalıserimiz de aıtyp otyr: nege biz barlyǵy úshin salyq tóleımiz, al ınternette mıllıardtap, mıllıondap aqsha jınap jatqan azamattar memlekettik qazynaǵa bir tıyn da quımaıdy degen máseleni qoıyp otyr. Osy sebepti de jarnamanyń san alýan túrin zańǵa bekitip, aldaǵy ýaqytta munyń barlyǵyn, eń aldymen Kásipkerlik kodekske jáne jyl sońynda keletin Salyq kodeksine engizip, sur ekonomıkada júrgen dúnıeniń barlyǵyn ashyq alańǵa shyǵarýǵa, memleket qazynasyn toltyrýǵa paıdalaný qajet", - deıdi depýtat Aıdos Sarym.
Internette jarnamamen aqsha tabatyn adamdar qyrkúıek aıyna deıin jeke kásipker retinde tirkelýi kerek. Sondaı-aq óz paraqshasynda onlaın-jarnama jarıalaǵanda jarnamanyń belgisin qoıýǵa mindetti.
Jalǵan aqparat úshin jaýapkershilik
Zań jobasyndaǵy taǵy bir jańashyldyq – jalǵan aqparat úshin salynatyn aıyppul. Osyǵan baılanysty Ákimshilik quqyq buzýshylyq týraly kodekske "456-2" degen jańa bap engiziledi. Onda onlaın platforma paıdalanýshylary men blogerlerge jalǵan aqparat taratqany úshin ákimshilik jaýapkershilik qarastyrylǵan.
Ákimshilik aıyppul somasy:
- jeke tulǵalar úshin 20 AEK (69 000 teńge);
- kásipkerlik qyzmetpen aınalysatyn blogerler úshin – 30 AEK (103 500 teńge);
- shaǵyn kásipkerlik sýbektileri, komersıalyq emes uıymdar úshin - 40 AEK (138 000 teńge);
- orta kásipkerlik sýbektileri úshin – 80 AEK (276 000 teńge);
- iri kásipkerlik sýbektileri úshin – 100 AEK (345 000 teńge).
Al quqyq buzýshylyq bir jylda qaıtalansa, aıyppuldyń kólemi eki esege ósedi. Tipti, qamaýǵa alý jazasyn da qoldanýy múmkin:
-
jeke tulǵalarǵa - 40 AEK (138 000 teńge) nemese 10 táýlikke deıingi merzimge ákimshilik qamaýǵa alý;
-
blogerlerge - 15 AEK (51 750 teńge) mólsherinde aıyppul nemese 15 táýlikke deıingi merzimge ákimshilik qamaýǵa alý;
-
shaǵyn kásipkerlik sýbektileri men komersıalyq emes uıymdarǵa - 60 AEK (207 000 teńge);
-
orta kásipkerlik sýbektilerine - 120 AEK (414 000 teńge);
-
iri kásipkerlik sýbektilerine - 250 AEK (862 500 teńge).
Derekkóz: Sputnik Qazaqstan
Pikir qaldyrý