Jazýshy Muhtar Maǵaýın "Halyq úni" portalynyń jýrnalısi Aıa Ómirtaıǵa bergen suhbatynda Qazaqstannyń eks-prezıdenti Nursultan Nazarbaev týraly pikir bildirdi. 

"Nazarbaev jóninde men ornynda otyrǵan kezde aıtqanmyn. 1995 jyldan bastap talaı ret aıtyldy. Aıtqandarym jazyldy, basyldy. 1995 jyly akademıadaǵy kezdesýde qatty aıttym. Sol kezde alǵash ret Saǵadıev saılanǵan kezde "Akademıany japtyrady", dep aıtqanmyn. Bul – eshqandaı kóripkeldik emes. Men óz qurdasymdy jaqsy tanımyn. Sol kezde "Qasqyr qoıdy jek kórgennen jemeıdi. Taýdaǵy rezıdensıalaryńyz óte jaqsy eken.  Sony alý úshin akademıany taratady", dedim. Bul sózderimniń bári joǵaryǵa jetipti. Keıin taratty ǵoı. Al Nazarbaev týraly buǵan deıin "Ultsyzdaný uranynda" aıttym. Álemde neshetúrli patsha boldy. Danyshpan patshalar boldy. Qolbasshy patshalar boldy. Saıasatker patshalar boldy. Aqymaq patshalar boldy. Psıhologıalyq jaǵynan aýyratyn patshalar boldy. Biraq halqyn, elin jerimen qosa satyp jibergen patsha bizge ǵana buıyrdy", deıdi Muhtar Maǵaýın suhbatynda. 

Budan bólek jazýshy zamanynda keı zıaly qaýym ókilderi Nazarbaevty maqtap esirtip jibergenin aıtty. 

"Basynda úmit ettik, árıne. Kezdeısoq kelgen adam edi. Alaıda ol – otarlyq úkimettiń odan ári otarlaı berý úshin qoıǵan adamy. Áýelbekov boldy, basqalary boldy. Alaıda Garbachev degen óte zulym adam ǵoı. Birde jazǵanym bar, soqyr Nıkolaıdan ótken mısyz Mıhaıl. Ol qazaqty janshyp tastaý úshin Jeltoqsandy uıymdastyrdy. Áýel bastan qazaqqa qarsy jumys jasady. Qazirgi jemqorlyq jeý degen ol bir ǵana nárse. Nazarbaev qazaqty tozdyrdy, azdyrdy. Goloshekın  kezinde qazaqtyń úshten ekisin qyryp tastasa, Nazarbaev búkil qazaqtyń jan dúnıesin joq qyldy. Buzyldy. Halyq buzyldy. Bul jóninde keıinirek arnaıylap jazatyn shyǵarmyn.  Nazarbaev otarlyq zamannyń jalǵasy, sol burynǵy otarlaý úkimetiniń rezıdenti. Árıne, belgili bir mólsherde qazaqtyń, ózimizdiń de kinámiz boldy. Zıaly qaýym Nazarbaevty Nuh paıǵambarǵa da, Musa paıǵambarǵa teńedi. Onyń bári saqtalyp turǵan shyǵar. Sondyqtan belgili mólsherde esirtip jibergen ózimiz", deıdi jazýshy.