Jazýshy Muhtar Maǵaýın eldegi dinı ahýalǵa qatysty pikir bildirip, qazaqtyń dinnen arylýy keregin aıtty. Bul týraly jazýshy "Halyq úni" portalynyń jýrnalısi Aıa Ómirtaıǵa bergen suhbatynda aıtty. 

"Din degen apıyn degen. Sol durys sóz. Onyń mánisin uǵynyp jatqan joq. Apıyn az qoldansa em, kóp qoldansa aýrý. Men solaı uǵynamyn. 19 ǵasyrdaǵy qazaqtyń zıalylary, oqyǵandary nege qarsy kúresti? Otarlyqqa qarsy áreket jasap, dinge qarsy kúresti. Din degen qarańǵylyq. Ásiredinshildiktiń túkke keregi joq. Mádenıet pen ǵylym-bilimdi jetkizetin din emes. Meshit emes, mektep. Bizge arabtyń ne keregi bar? Onyń bári bizdiń tabıǵatymyzǵa jat nárse. Jalpy dinshildikti azaıtý kerek. Qazaq dinnen arylý kerek.  Kádimgi zıalylyqqa jetý kerek. Zaıyrly memlekettik sanaǵa jetý kerek. Ásirese, balalardy buzyp bara jatyr. Jazatyn da, aıtatyn da nárse kóp. Endi oılamaǵan jerde, din qazaqqa qaıshy bolyp shyqty. Dindarlar qazaqtyń salty men dástúrine qarsy. Kıimine qarsy. Tipti, qazaqtyń tilin búldirdi. Sońynda beıit turǵyzýǵa qarsy shyǵyp, kelin sálem bermeý kerek dedi. Osynyń bári qazaqty qurtatyn nárse. Birazyna zań júzinde shara qoldaný kerek. Keshegi sáláfıtterdiń nasıhatshylary bar kórinedi. Nazarbaevtyń inisiniń balasy qazir túrmede otyr. Olarǵa memleket tarapynan, Nazarbaevtyń tarapynan qoldaý boldy. Óıtkeni ol qazaqty ekige bóledi. Nasıhaty úkimetke qarsy bolmasa boldy. Memlekettik ulttyq sanadan aıyrady. Sondyqtan bul qazaqqa qarsy jasalǵan qylmys bolatyn", deıdi Muhtar Maǵaýın.