Májilis depýtaty Erlan Saıyrov kópbalaly analardyń tisin tegin emdep berýdi usynyp, premer-mınıstrdiń orynbasary Tamara Dúısenovaǵa saýal joldady.

   Depýtattyń aıtýynsha, ekonomıkany damytatyn basty qaınar kóz – adam.

– Adamdy dúnıege ákeletin – áıelder. Memleket olarǵa qamqorlyq jasap, olardyń jan-dúnıesin aıalap, densaýlyǵyna basa mán berýine mindetti. Elimizde áıel bosanǵannan keıin densaýlyǵyn saqtaý úshin qandaı sharalar qarastyrylǵan? Bala týǵannan keıin beriletin járdemaqy bar. Onyń mólsheri – 1-3 balaǵa 140 myń teńge, tórt jáne odan kóp balaǵa 232 myń teńge qarastyrylǵan. Shyndyqty aıtsaq, bul – áıelge emes, balanyń kútimine beriletin soma, – dedi Erlan Saıyrov.

Sondaı-aq  depýtat shetelde bala kútimine beriletin soma joǵary ekenin aıtady. Máselen, Reseıde ana kapıtalynyń somasy birinshi balaǵa 639 myń rúbl (3 mln 195 myń teńge), ekinshi balaǵa 883 myń rúbl (7 mln teńge) beriledi.

– Qazaqstanǵa da laıyqty, ádiletti ana kapıtalyn jasaqtaıtyn ýaqyt jetti. Bul – kezek kúttirmeıtin másele. Elimizde uzaqmerzimdi demografıany damytý strategıasynyń basty aspektisi – laıyqty ana kapıtalyn qalyptasyrý. Ana bala kótergende, qursaqta balanyń qalyptasýyna kálsıdi kóptep jumsap, óziniń tisinen aıyrylatyny – medısınalyq fakt. 543 myń kópbalaly áıeldiń barlyǵynyń basynda bar problema – tistiń túsýi, – deı otyryp, kópbalaly analardyń tisin tegin emdep berýdi usyndy.

– Qazaqstandaǵy stomatologıa baǵasynyń kúıip turǵanyn bárimiz jaqsy bilemiz! Sondyqtan birinshi kezekte kópbalaly analarǵa tisin jóndeý úshin birrettik qarjylyq tólem qalyptastyrý qajet. Bala tapqan áıelderdiń densaýlyǵyn qalypqa keltirip, ustap otyrýdyń memlekettik standarttary kerek, – dedi depýtat.