Sondaı-aq jospar boıynsha 2030 jylǵa deıin Almatyda 296 shaqyrym BRT jolaǵy salynady. Qazir qalada mundaı joldyń uzyndyǵy 8 shaqyrym ǵana. Júrdek avtobýs jelisi 31 km tramvaı joly, 4 jańa metro beketi jáne 3 kólik tobyn qamtıdy.

BRT jelisi megapolıstegi Ál-Farabı dańǵyly, Saın kóshesi, Shyǵys aınalma, Seıfýllın dańǵyly, Dostyq dańǵyly, Gogol, Sátbaev jáne Shalápın kóshelerinen ótetinin sqemadan  kórýge bolady.

Osy oraıda, aıta ketetini, jospar boıynsha barlyq jumys bir mezette júrgizilmeıdi. Iaǵnı, joba úsh kezeńge bólingen. Birinshi kezekte 2024 jyly Raıymbek dańǵylynyń Pýshkınnen Ahremenko kóshesine deıingi bóliginde arnaıy jolaq túsedi, ol 2026 jylǵa qaraı Almatynyń batys shekarasyndaǵy «Barlyq» bazaryna deıin sozylady. Avtobýs jelisi jol ortasyna, ıaǵnı sol jaq shetki jolaqqa (Ótegen batyrdan Áýezovke deıin jáne Seıfýllınnen Pýshkınge deıin) jáne joldyń oń jaq shetine syzylady.

Sonymen qatar Raıymbek dańǵylynda qoǵamdyq kólik jyldamdyǵyn saǵatyna 50 km-ge shektep, ondaǵan jer ústi jaıaý júrginshiler ótkelin salady, 17 baǵdarsham men 60 beınebaqylaý kamerasyn ornatady.

Bas jospardyń ekinshi kezeńinde, 2025–2026 jyldary 11 kólik dálizi salynady, al qalǵan 28-i 2027–2030 jyldary boı kóteredi. BRT jelisimen birge mamandar qoǵamdyq kólik, LRT jumysyn jańartyp, metropolıtendi keńeıtedi. Atap aıtqanda, Abaı dańǵyly men Áshimov qıylysyna jaqyn jerde ornalasatyn «Qalqaman» beketi jáne Raıymbek dańǵyly boıyndaǵy «Barlyq» bazary mańynda jańa beket bolady. Al qazirgi tar kóshege avtobýs jolaǵyn salýǵa tyıym salatyn norma da ózgeredi.