2024 jyly oblysta aýyl sharýashylyǵy daqyldarynyń egin jınaý alańy 749,5 myń gektardy qurady. Onyń ishinde dándi daqyldar 299,0 myń ga, maıly daqyldar 295,8 myń ga, kartop 5,8 myń ga, kókónister 5,4 myń ga, al jemshóp daqyldary 143,5 myń gektar alqapqa egildi. Bul týraly oblys ákimdiginde ótken keńeıtilgen aparattyq jıynda oblystyq Aýyl sharýashylyǵy basqarmasynyń basshysy Ertaı Qýanbaev aıtty. 

Búgingi tańda óńirde astyq jınaý tolyq aıaqtaldy. Ortasha ónimdiligi 15,0 s/ga bolatyn 449,7 myń tonna astyq bastyryldy. 444,8 myń tonnadan astam maıly daqyl, 134,2 myń tonna kartop, 128,4 myń tonna kókónis jınaldy. 

5,8 myń ga alqaptan kartop 229,8 s/ga jınalyp, nátıjesinde 134,2 myń tonna ónim alyndy. Kókónisterdi jınaý da aıaqtaldy. Ónimdiligi 236,9 s/ga bolatyn 128,4 myń tonna jınaldy.

Egin orý jumysyna 4 myń traktor, 2,4 myń kombaın jáne 700 oraq tartyldy. Aýyl sharýashylyǵy tehnıkasynyń úzdiksiz jumys isteýi úshin lıtrine 250 teńge baǵamen 15,3 myń tonna jeńildetilgen dızel otyny bólindi.

Tuqym sapasyn jaqsartýǵa erekshe kóńil bólinýde. Bıyl tuqymnyń elıtalyq sorttaryn paıdalaný úlesi 8,3% qurady. Bul 2023 jylmen salystyrǵanda 0,8%-ǵa joǵary. Sondaı-aq 49 myń tonna mıneraldy tyńaıtqyshtar engizildi.

Mashına-traktor parkin jańartý aıasynda «QazAgroQarjy» AQ arqyly 7 mlrd teńgege 547 birlik tehnıka satyp alyndy. Egin jınaýǵa arnalǵan qoımalarǵa jalpy syıymdylyǵy 206 myń tonna lısenzıalanǵan elevatorlar jáne 870,9 myń tonna fermerlik astyq qoımalary kiredi.
2025 jyldyń kóktemgi egisine 39,6 myń tonna tuqym daıyndaldy, bul qajetti kólemniń 103,3% quraıdy. 

Aǵymdaǵy jyly oblysta sý únemdeý tehnologıalaryn qoldaný arqyly 13,9 myń gektar alańǵa aýyl sharýashylyǵy daqyldary egildi.