Aýyl sharýashylyǵy – Qazaqstan ekonomıkasynyń negizgi salalarynyń biri, ol azyq-túlik jáne ekonomıkalyq qaýipsizdikti qamtamasyz etedi, sondaı-aq aýyldyq jerlerde eldiń eńbek áleýetin damytýǵa yqpal etedi. Qazirgi zamanda sıfrlyq tehnologıalar elder ekonomıkasynyń damýynda mańyzdy ról atqaryp keledi. IT-quraldaryn engizý aýyl sharýashylyǵy óndirisiniń ónimdiligin arttyryp qana qoımaı, sonymen qatar aýyl sharýashylyǵynyń básekege qabilettiligin arttyrýǵa múmkindik beredi. Óńirdegi aýyl sharýashylyǵy salasyn sıfrlandyrý jaıynda oblystyq aýyl sharýashylyǵy basqarmasynyń basshysy Ertaı Qýanbaev ÓKQ alańynda málimdedi.

Onyń aıtýynsha, ınovasıalyq tehnologıalar qazir ósimdik sharýashylyǵyna belsendi túrde engizilýde.

- Búginde oblystyń aýylsharýashylyq taýar óndirýshileri qunarly qabatty saqtaý úshin ártúrli modıfıkasıalardyń 37 egis kesheni, sondaı-aq dál eginshilik, navıgasıa jáne monıtorıń júıeleri bar álemdik aýyl sharýashylyǵy tehnıkasyn óndirýshilerdiń (John Deere, Case New Holland, Fendt, Massey Ferguson, Valtra jáne Challenger) aýyl sharýashylyǵy tehnıkasyn paıdalanady. Sonymen qatar, oblysta 13 850 gektar aýmaqta sý únemdeý tehnologıalary qoldanylady (onyń ishinde jańbyrlatyp sýarý – 12 257,2 ga jáne tamshylatyp sýarý – 1 572,8 ga). Sondaı-aq sharýashylyqtar aýyl sharýashylyǵy tehnıkasynda GPS navıgasıasyn keńinen qoldanady, – dep atap ótti ol.

Basqarma basshysynyń málimdeýinshe, mal sharýashylyǵynda da sıfrlyq tehnologıalar belsendi túrde engizilýde. Naqtyraq aıtsaq, «Qalıkanuly», «Zeıtenov», «Órnek» sıaqty sharýa qojalyqtarynda  ozyq smart-fermalardyń elementteri qoldanylady. Baǵdarlamalyq qamtamasyz etý arqyly naqty ýaqyt rejıminde ár sıyrdan kúndelikti esep júrgizilip, uryqtandyrýdy esepke alý úshin seleksıalyq jáne asyl tuqymdy jumystardyń aqparattyq bazasynda buqalardy kompúterlik tańdaý ádisi qoldanylýda.