Buǵan deıin áleýmettik jelilerde qazaqtyń ulttyq kıimimen "Han Shatyrǵa" kirýge bolmaıtyny týraly blogerdiń vıdeosy tarady. Ortalyq osy máselege resmı jaýap berip, túsinbeýshilik bolǵanyn aıtyp, halyqtan keshirim surady.

"Han Shatyr" saýda oıyn-saýyq ortalyǵy eshqashan jáne esh ýaqytta qazaqtyń ulttyq kıimin kıýge qarsy bolǵan emes, sebebi bul – bizdiń ulttyq qundylyǵymyz. Kerisinshe, alǵashqy kúnderden bastap búginge deıin biz memlekettik uıymdarmen tyǵyz yntymaqtastyq ornatyp, ulttyq muramyzdy, dástúrlerimizdi jáne ónerimizdi nasıhattaýǵa baǵyttalǵan is-sharalarǵa belsendi kórsetip kelemiz, - dedi oıyn-saýyq ortalyǵy.

"Han Shatyr" qazaqtyń mádenıetin, dástúrleri men tilin saqtaý men órkendeýge baǵyttalǵan barlyq bastamany qoldaýdy jalǵastyra beretinin málimdedi.

Ókinishke qaraı, saýda ortalyǵynyn kelýshisi men kúzet fırma qyzmetkeri arasynda túsinbestik pen jaǵymsyz oqıǵa boldy. Osy jaǵdaıǵa baılanysty biz osy oqıǵaǵa tap bolǵan kelýshimen kezdesip, mán-jaıdy tolyq túsindirip, resmı túrde keshirim suradyq. "Han Shatyr" saýda oıyn-saýyq ortalyǵynyń atynan osy oqıǵa saldarynan kóńiline qaıaý túsken Qazaqstan Respýblıkasy azamattarynan shyn júrekten keshirim suraımyz. Túsinistik tanytqandaryńyz úshin alǵysymyzdy bildiremiz jáne osyndaı keleńsizdikter qaıtalanbaıdy dep úmittenemiz, - delingen ortalyqtyń resmı jaýabynda.