Mádenıet jáne aqparat mınıstrligi ulttyq kınony damytý jáne halyqaralyq deńgeıde ilgeriletý jumystaryn jalǵastyrýda.
Otandyq týyndylar 300-den astam halyqaralyq kınofestıvalge qatysyp, 177 júlde ıelendi. 2020-2025 jyldar aralyǵynda Ulttyq kınony qoldaý memlekettik ortalyǵy túrli janrdaǵy 119 kınojobany júzege asyrdy.
Sońǵy eki jylda úsh pıchıng (kınojobany qarjylandyrýǵa nıetti ınvestorlardy tartý maqsatynda ótkiziletin vızýaldy tanystyrylym) ótkizilip, onyń nátıjesinde 57 jobanyń 40-y jas kınematografısterdiń qatysýymen júzege asyrylýda.
2024 jyly konkýrsqa irikteý erejeleri qaıta qaralyp, proses ashyq ári tıimdi boldy. Basym taqyryptar belgilenip, senarı ázirleý merzimi qysqardy. Qujattardy elektrondy túrde qabyldaý engizilip, Sarapshylar keńesiniń daýys berý mehanızmi jetildirildi. Bul ózgerister qazaq tilindegi senarıler úlesin 75%-ǵa jetkizip, rejıserlerdiń qatysýyn arttyrdy.
«Qaitadan» fılmi memlekettik qoldaý alyp, otandyq prokatta 1 mıllıard teńgeden astam kasa jınap, mańyzdy jetistikke jetti. Fılm memlekettik ınvestısıalardy bes ese qaıtaryp, memlekettik qoldaý mehanızmderiniń tıimdiligin dáleldedi.
2025 jyly jańadan talantty akterlerdi (ásirese óńirlerden) izdeý jáne qoldaý maqsatynda «JARQYRA» respýblıkalyq kastıngi bastaldy. Bul joba arqyly jas ártister ózderin tanytyp, ulttyq kınematografıaǵa qosylý múmkindigine ıe boldy.
«Qazaq kınosynyń onkúndigi» aksıasy aıasynda otandyq fılmderdiń kórsetilimi Qaraǵandy, Jambyl, Soltústik Qazaqstan, Batys Qazaqstan jáne Jetisý oblystarynda ótkizildi.
Otandyq fılmder kórermenge qoljetimdi bola tústi. Qazir olar tek kınoteatrlarda ǵana emes, onlaın platformalarda da kórsetiledi. «Kınopoısk» platformasymen birlesip, 17 qazaqstandyq fılmnen turatyn arnaıy jınaq daıyndaldy. Oǵan «Patrıottar ýaqyty», «Kanıkýly off-line 2», «Dos-Muqasan», «Qajymuqan» jáne basqa da týyndylar kiredi. Bul shara qazaqstandyq kınematografıanyń tanymaldylyǵyn arttyrýǵa jańa múmkindikter ashýda.
Qazaqstandyq kıno óneri halyqaralyq deńgeıde turaqty oryn ala bastady. Sońǵy 30 jyl ishinde alǵash ret elimiz Kann kınofestıvali aıasyndaǵy iri Marché du Film kınonaryǵyna qatysyp, KazakhCinema ulttyq stendi arqyly otandyq jobalardy damytýǵa mańyzdy múmkindik týǵyzdy.
Kann qalasynda Fransıa men Grýzıanyń ulttyq kınoortalyqtarymen memorandýmdarǵa qol qoıyldy. Al, Aqtaýda Ázerbaıjan, Qyrǵyzstan, Túrkıa, Túrikmenstan jáne Ózbekstannyń kıno uıymdarymen yntymaqtastyq týraly kelisimder jasaldy.
Halyqaralyq jobalar qatarynda Lokarno men Pýsan festıválderinde usynylǵan «Skazka o morskıh psah» atty derekti fılm jáne «Pobedıteleı vıdno na starte» atty birlesken fılm bar.
Qazaqstandyq kıno óneri jańa belesterdi baǵyndyra otyryp, otandyq jáne sheteldik kórermenge senimdi túrde jol tabýda.
Mádenıet jáne aqparat mınıstrliginiń baspasóz qyzmeti
