Adamnyń ózin jaqsy sezinýi úshin táýligine kem degende jeti jarym saǵat uıyqtaýy kerek. Uıqynyń azdyǵy kúızelis, sýsamyr (qant dıabeti), júrek-qantamyr aýrýlary men jazataıym oqıǵalardyń týýyna sebep bolady. Lıds Ýnıversıtetiniń psıhologtary 18 ben 80 jas aralyǵyndaǵy 1024 brıtandyq azamattyń arasynda suraý júrgizip, jańa tujyrym jasady, dep habarlaıdy «Qamshy» portaly The Daily Mail-ǵa silteme jasap.

30 ben 50 jas aralyǵyndaǵy respondentterdiń 25 paıyzǵa jýyǵy durys tynyqpaǵan. Olardyń bir jylda 15 kúnge jýyq uıyqtamaǵany anyqtaldy. Osydan keıin qatysýshylardyń 42 paıyzy jumysqa baılanysty kúızeliske ushyraǵanyn aıtyp, shaǵymdandy. 30 paıyzy jumystyń kesirinen uıqy qanbaıtynyn aıtty.

Suralǵandardyń 5 paıyzy ǵana nebári 5 saǵat uıyqtaýdy aldyn ala josparlaǵan eken. Respondentterden aldaǵy tún qalaı ótkeni týraly suraǵanda, olardyń 25 paıyzy 5 saǵattan kem uıyqtaǵandaryn aıtty.

Aıta keteıik, Kalıfornıa ýnıversıtetiniń zertteýshileri taıaýda táýligine 8 saǵat uıyqtaý qajet degen tujyrymdy joqqa shyǵarǵan. Olardyń aıtýynsha, is júzinde, nebári 6-7 saǵat uıyqtaý da jetkilikti.