Ómirin el ıgiligine arnaǵan, jol salasynyń damýyna eleýli úles qosqan azamat, abyroıly basshy, eńbekqor maman — Nurjan Saılaýbekuly Jumadilov bul fánıden baqıǵa ozdy. Marqumdy aqtyq saparǵa shyǵaryp salý rásimi 4 maýsym kúni Astana qalasynda ótedi.
Nurjan Saılaýbekuly 1969 jyly Shyǵys Qazaqstan oblysy, Aıagóz aýdanyna qarasty Tarbaǵataı aýylynda dúnıege keldi. Týǵan topyraǵyna degen súıispenshiligi men elge qyzmet etsem degen asqaq armany ony ómir jolyna bastaǵan edi.
Óskemen qurylys-jol ınstıtýty men D. Serikbaev atyndaǵy Shyǵys Qazaqstan tehnıkalyq ýnıversıtetin támamdaǵan soń, ol ınjener-qurylysshy jáne ekonomıka mamandyqtaryn ıgerip, naǵyz el tiregine aınaldy.
Asfáltpen astasqan adal eńbek
Eńbek jolyn 1993 jyly jol sheberi bolyp bastaǵan jas mamannyń boıyndaǵy eńbekke degen jaýapkershilik pen uqyptylyq ony birden alǵa jeteledi. Jol boıyndaǵy árbir qıyrshyq tas pen tóselgen asfáltta onyń qoltańbasy qaldy dese, artyq emes.
Ýaqyt óte kele ol prorab, óndiristik-tehnıkalyq bólim basshysy, keıin «Qazaqavtojol» mekemesinde jol paıdalaný ýchaskesiniń jetekshisi boldy. 2006 jyldan bastap jol sapasyn baqylaý men qabyldaý júıesin basqarsa, 2009 jyldan bastap oblystyq deńgeıdegi jol ınfraqurylymyn damytý isine aralasty.
Qyzmetpen qatar – qurmet
Nurjan Saılaýbekuly ár kezeńde qandaı qyzmet atqarsa da, uqyptylyq pen ádilettilikti tý etip, áriptesterine úlgi bola bildi. 2018–2021 jyldary Shyǵys Qazaqstan oblysynyń jolaýshy kóligi jáne avtomobıl joldary basqarmasyn basqardy. Jol jóndeýdiń jańa standarttaryn engizip, shalǵaı aýyldarǵa deıin jetken sapaly joldarmen el alǵysyna bólendi.
2021–2022 jyldary oblys ákiminiń orynbasary bolyp, úlken saıasat pen strategıalyq sheshimderdiń bel ortasynda júrdi. Al sońǵy qyzmeti – oblystyq jol basqarmasynyń basshysy retinde, óziniń súıikti salasyna qaıta oralyp, bar kúsh-jigerin sala damýyna arnady.
İzi qalǵan izgi jan
Nurjan Saılaýbekuly jol salasyn tek kásibı orta dep emes, ómiriniń máni, azamattyq paryzy dep bildi. Ol — óz isine adal, ult taǵdyryna beıjaı qaramaǵan naǵyz eljandy tulǵa edi.
Endi onyń jarqyn beınesi — áriptesteriniń, dostarynyń, qyzmettesteriniń jáne jol-kólik salasynda eńbek etip júrgen myńdaǵan mamannyń júreginde máńgilik saqtalmaq.
Imandy bolsyn. Jatqan jerińiz jaryq, rýhyńyz peıishte shalqysyn, asyl azamat!
