Búgin Almatydaǵy Abaı atyndaǵy opera jáne balet teatrynda «Altyn júrek» qaıyrymdylyq syılyǵymen saltanatty túrde marapattaý rásimi ótedi. Bul týraly «Qamshy portaly» «Baýyrjan» qaıyrymdylyq qorynyń baspasóz qyzmetine silteme jasap habarlaıdy.
Qaıyrymdylyq syılyǵynyń marapattaý rásimi Almaty qalasynyń ákimi Baýyrjan Baıbektiń qatysýymen ótedi.
Sharany «Baýyrjan» qaıyrymdylyq qory «Nur Otan» partıasynyń qoldaýmen uıymdastyrady. Bul keshke «Altyn Qyran» kompanıalar toby men «ForteBank» AQ-y áriptes bolyp otyr.
Bıylǵy jyly «DOM» qaıyrymdylyq qorynyń usynýymen Qazaqstan Prezıdenti Nursultan Nazarbaev syılyqtyń «Jyldyń qaıyrymdy adamy» atalymy boıynsha qatysýda. Ózge de atalym ıeleri qatarynda alǵashqy balalar hospısin uıymdastyrýshy Nagıma Plohıh, KTK telearnasynyń «Doroga Domoı» jobasy, Samsung Central Asia kompanıasy, 11 balanyń ákesi Murat Qabylbaev, «Rodına» agrofırmasy, Qazaqstandaǵy alǵashqy Training Cafe uıymdastyrýshysy Anna Qudıarova jáne de sheteldik azamat, Taraz qalasynda jetimderge baspana ashqan Vıktorıa Sharbone, taǵy da basqalary bar.
Kesh Turkvision-2014 baıqaýynyń jeńimpazy Janar Doǵalovanyń ásem ánimen saltanatty túrde ashylyp, qazaqstandyq estrada juldyzdarynyń qatysýymen ótedi dep josparlanýda. Kesh qonaqtary qatarynda dombyrashy Asylbek Eńsepov, QR halyq ártisi Nurjamal Úsenbaeva, skrıpkashy Jámılá Serkebaeva, MEZZO toby jáne basqalar óner kórsetedi.
Sonymen qatar, kelýshilerge arnaıy «100 qaıyrymdy is» atty fotokormesi uıymdastyrylady.
«Altyn Júrek» - bul Ortalyq Azıadaǵy jáne qazaqstandyq qaıyrymdylyq salasyndaǵy alǵashqy jáne qazirgi birden-bir bedeldi syılyq bolyp tabylady. Syılyq uıymdastyrýshylary «Baýyrjan» qaıyrymdylyq qory jyl boıyna respýblıka boıynsha «Qazaqstannyń Altyn Júregi» atanýǵa laıyq qaıyrymdy jandardy izdestirdi.
Syılyqtyń uıymdastyrý komıtetiniń bergen málimetterine súıensek, 2015 jyly respýblıkada jalpy 12 mıllıard teńge kóleminde qaıyrymdylyq sharasy júzege asyrylǵan. Qazaqstandaǵy qaıyrymdy adamdar men eriktilerdiń kómegimen 6 sporttyq mektep, 5 balabaqsha salynyp, 5 jalpy bilim beretin mektepke, 4 múgedek balalarǵa arnalǵan balabaqshaǵa, jaǵdaıy tómen otbasynyń balalaryna arnalǵan 2 lagerǵa jóndeý jumystary júrgizildi, 8 kompúterlik synyp pen 5 emhana qural-jabdyqtar men qamtyldy, jaǵdaıy nashar otbasynan shyqqan 1000 bala oqýǵa daıyndaldy, UOS 25 ardageriniń páterlerine jóndeý jumystary júrgizildi jáne Almatynyń sel bolǵan aımaqtaryna 7 kún boıyna asqanalarda eriktiler 5 myńdaı adamdy kúnine eki ýaqyt tamaqtandyrdy.
