19-23 qazan aralyǵynda Qyrǵyzstan Respýblıkasynda ótken V Halyqaralyq «Art Ordo» teatrlar festıvalinde M. Áýezov atyndaǵy qazaq memlekettik akademıalyq drama teatry «Eń úzdik qoıylym» nomınasıasy boıynsha bas júldemen marapattaldy. Bul týraly «Qamshy» portaly teatr baspasóz qyzmetine silteme jasap habarlaıdy.

Bas júldeni festıválde sahnalanǵan J.Erǵalıevtiń «Qas qaǵym» metafızıkalyq tragedıasynyń rejıseri Elik Nursultanǵa Qyrǵyzstan Respýblıkasynyń mádenıet, aqparat jáne týrızm mınıstri Altynbek Maqsutov óz qolymen tabystady.

Qyrǵyzstanda ótken festıválge Qazaqstannan M. Áýezov atyndaǵy Qazaq memlekettik akademıalyq drama teatry men S.Muqanov atyndaǵy Soltústik Qazaqstan oblystyq qazaq sazdy-drama teatry qatysqan edi.

Budan bólek, Mýkımı atyndaǵy Ózbek memlekettik akademıalyq mýzkomedıa teatry, Latýhı atyndaǵy Tájik memlekettik drama teatry, Naberejnochelnıdegi Tatar memlekettik akademıalyq drama teatry, M.Vahıdova atyndaǵy Tájik memlekettik jastar teatrlary da festıválde óner kórsetti.

Festıválde eń úzdik qoıylym – bas júlde, eń úzdik rejıser, eń úzdik senografıa, eń úzdik erkek roli, eń úzdik áıel roli, ekinshi plandaǵy erkek roli, ekinshi plandaǵy áıel roli, synshylar kózaıymy syndy nomınasıalar boıynsha júldeler tabystaldy.

KSRO halyq artısi Asanáli Áshimov tórǵalyq etetin qazylar alqasynyń quramynda Altynaı Tadjıbaeva – ónertaný ǵylymdarynyń doktory (Ózbekstan Respýblıkasy, Tashkent, Máskeý), Ato Hodjaev – Tájikstannyń halyq jazýshysy  (Tájikstan Respýblıkasy, Dýshanbe); Andreı Iastrebov – fılologıa ǵylymdarynyń doktory, profesor (GITIS, Reseı federasıasy); Rashat Faızrahmanov – teatr qaıratkeri (Tatarstan, RF, Naberejnye Chelny); Nurlan Ábdiqadyrov – Qyrǵyzstannyń eńbek sińirgen óner qaıratkeri (Qyrǵyzstan Respýblıkasy, Bishkek); Marat Kozýkeev – Qyrǵyzstannyń eńbek sińirgen artısi, (Qyrǵyzstan Respýblıkasy, Bishkek) syndy mamandar bar.

Budan bólek, festıválde quramynda ónertanýshy ǵalymdar bar synshylar alqasy da jumys isteıdi.