Astana osy qalpymen kete berse shynymen de «arman qala» bolatyn shyǵar. Sebebi, qarapaıym halyqtyń ómir súrip, jan baǵýy óte kúrdeli. Qala turǵyndarynyń basym bóligi tapqan-taıanǵanyn páteraqy jaldaýǵa jumsaıdy Onyń ústine kúndelikti tutynatyn azyq-túlik baǵasynyń sharyqtaýy jyǵylǵanǵa judyryq bolyp otyr. Al endi buǵan qoǵamdyq kóliktiń jyryn qosyńyz. Sebebi, «ertegi elinde» qoǵamdyq kólikte júrý quny 90 teńge.
Jol júrý baǵasynyń 60 teńgeden 90 teńgege kóterilýine qala ákimi Ádilbek Jaqsybekovtyń esh qatysy joq. Sebebi, bul qymbatshylyq oǵan deıin jasalǵan bolatyn. Alaıda, quny 10 mıllıon turatyn jyly aıaldamalardyń jyryna Jaqsybekov myrzanyń tikeleı qatysy bar. Árıne, bir qaraǵanda ákimniń bastamasyna «Bárekeldi» degennen basqa eshteńe aıtqyń kelmeıdi. Sebebi, Astananyń qytymyr aıazynda avtobýsty saryla kútý qarasha halyqqa ońaı emes. Sondyqtan da Elorda kóshelerinde jyly aıaldamalardyń bolǵany óte oryndy.
Áıtse de, quny 36 myń dollar turatyn aıaldamanyń bir aıǵa jetpeı buzylyp qalýy otqa maı quıa tústi. Sebebi, dál osyndaı aıaldamalar Reseıde ne bári 200 myń rúbl turady eken. Bul týraly «Astana» telearnasyna bergen suhbatynda Krasnoıar qalasy Sverdlov aýdany ákimshiligi basshysynyń birinshi orynbasary Alekseı Isaev málim etti.
– Reseıdiń Krasnoıar qalasy Svedlov aýdanynyń bıligi 2012 jyly osyndaı nysandardy ornatqan. Bireýi 200 myń rúblge túsken. Onyń ózine búdjettiń emes, bıznestiń qarjysyna turǵyzyldy. Eskeretin bir jaı aıaldamanyń quny oǵan qansha adamnyń sıatynyna baılanysty. Eger kóp adam syısa, árıne, qymbatyraq bolady. Al standartty aıaldama 200-220 myń rúbl turady. Bul eń kóp degende 10 myń dollar, – deıdi Alekseı Isaev.
Taıaýda Memleket basshysy Nursultan Nazarbaev Úkimet basshysy Kárim Másimovty qabyldap, «naǵyz daǵdarys endi bastaldy» dep málimdedi. Bul degen sóz aldaǵy ýaqytta qarjynyń ońdy-soldy shasha bermeı, únemdep jumsańdar degendi bildiredi. Áıtse de Astana qalasynyń ákimi Ádilbek Jaqsybekovke daǵdarys sezilmegen sıaqty. Óıtkeni atalǵan ákimdik jyldyń sońyna deıin quny 10 mıllıon teńge turatyn 25 aıaldama paıdalanýǵa beremiz dep qulshynyp otyr. Demek ákimdiktiń búdjetinen 25 aıaldamaǵa 250 mıllıon teńge jumsalady.
Osy rette daǵdarys kezeńinde bizge dál osyndaı qymbat aıaldamalar kerek pe degen zańdy suraq týyndaıdy. Alaıda, bizdiń keıbir pysyqaılar «daǵdarys naǵyz aqsha tabatyn kezeń» degen támsildi jaqsy meńgergen tárizdi. Onyń ústine ákimdik ákesin tanytyp maqtaǵan VIP aıaldamalardyń esigi buzylyp, jaramsyz bolyp jatyr. Máselen, «ASIA PARK» saýda oıyn-saýyq ortalyǵyna qoıylǵan aıaldamanyń esigi jabylmaı qalǵanyn óz kózimizben kórdik. Sondyqtan da, onyń ishinde bolsańda, syrtynda bolsańda bári bir sýyq aýa raıy seziledi. Toqsan aýyz sódiń tobyqtaı túıini astanalyq turǵyndar Ádilbek Jaqsybekovtyń jańalyǵyn jaqtyrmaı otyr.
Aıtpaqshy, Jaqsybekovtyń qoǵamdyq kólikke engizgen jańalyǵy bul ǵana emes. Astana qalasy ákimdigi jazdan beri qoǵamdyq kólikterge jańartý jumystaryn júrgizip jatyr. Mysaly Astananyń irgesindegi aýyldarǵa ekspress avtobýstar qatynaıtyn boldy. Bul árıne qarasha halyqqa qolaıly jaǵdaı jasalǵanyn bildiredi. Alaıda jańartýdyń jaǵymsyz jaqtaryda joq emes. Aıtalyq, buryn Shanhaı bazarynan bastap Qaraótkel aýylyna deıin № 36 avtobýs qatynaıtyn. Qazir osy bir baǵyttaǵy avtobýsty ekige bólip tastady. Iaǵnı, búginde Shanhaı bazarynan qoǵamdyq kólikke mingen adamdar Astana medısına ýnıversıtetinen túsip qalyp, ekinshi №36 avtobýsqa otyrady. Demek, buryn 90 teńgege baratyn jerińizge qazir 180 teńge jumsap jetesiz. Bul jańalyqqa Astana irgesindegi keıbir aýyldardyń turǵyndary narazy bolyp, sol kúni máseleni sheship aldy. Al Astana men Qaraótkelge qatynaıtyn №36 avtobýs qarashanyń qaltasyn qaǵyp tur. Uzyn sózdiń qysqasy Astana qalasy ákimdigi avtoparkterdiń aıtqanyn eki etpeı, aqsha tabýyna jaǵdaı jasap jatyr.
Serik JOLDASBAI
Astana
