Biz buǵan deıin Almatydaǵy qoǵamdyq kólikterge «Ońaı» elektrondy bılettendirý júıesin engizý máselesi týraly jazǵan edik. Maqalada bul bastamany qoldanysqa engizý birshama qıyndyqtarǵa tap bolýy múmkin degen boljam da aıtylǵan edi. Aıtyp aýyz jımadyq, «Almaty kólik holdıńi» kompanıasynyń basshylyǵy avtobýs júrgizýshileriniń «Ońaı» júıesine qarsy maıdan ashqanyn jarıalap otyr.

«Almaty kólik holdıńi» JSHS-i baqylaýshylar keńesiniń múshesi Rıfat Abdýramanovtyń aıtýynsha, qoǵamdyq kólik júrgizýshileri buryn ózderi jınaıtyn jol júrý aqysynyń elektrondy júıe arqyly neme moneta qabyldaıtyn arnaıy valıdatorlarǵa tólenýin «qyzǵanatyn» sıaqty. Baqylaýshylar men birqatar jolaýshylar avtobýstarǵa ornatylǵan «Ońaı» kartalaryn oqıtyn apparattardy paketpen qaptap tastaǵandaryn baıqap qalyp, shaǵymdanǵan. Tipti, keı júrgizýshilerdiń valıdatorlardy ruqsatsyz ashyp, ondaǵy aqshaǵa qol salý oqıǵalary kezdesken. Ondaı júrgizýshilerdiń ústinen qylmystyq is te qozǵalyp jatqan kórinedi.

1 qazannan bastap Almatydaǵy birqatar baǵyt boıynsha qoǵamdyq kólikterde qoldanysqa enýi tıis «Ońaı» elektrondy bılettendirý júıesi osyndaı kedergilerge tap bolýda. Ádette, qarapaıym jol erejelerin saqtamaıtyn avtobýs júrgizýshilerine quny 1500 eýro turatyn qymbat apparattardy senip tapsyrǵan «Almaty kólik holdıńiniń» bul áreketi shynymen de qasqyrǵa qoı baqtyrǵannyń kebi sekildi kórinedi. Endi aldyn-ala túsindirý jumystary júrgizilip, tutynýshylar men qyzmet kórsetýshilerdiń mádenıet deńgeıin durys baǵalamaı asyǵys sheshim jasaý qyrýar qarjynyń jelge ushýyna ákep soqpasa jarar edi degen qynjylys kóptiń kóńilin mazalary sózsiz.