Ókimet basyndaǵylar halyq kóp jınalatyn mádenı-kópshilik, qoǵamdyq-saıası jáne sporttyq is-sharalardan sekem ala bastaǵandaı. Aldaǵy ýaqytta halyq kóp jınalatyn mundaı sharalardy ótkizý kezinde uıymdastyrýshylar men qatysýshylardyń jaýapkershiligi kúsheıtilmek. Májiliske «Mádenı-sporttyq, sporttyq jáne basa da kópshilik is-sharalardy ótkizý kezinde qaýipsizdikti qamtamasyz etý máseleleri boıynsha QR-nyń birqatar zańnamalyq aktilerine ózgerister men tolyqtyrýlar engizý týraly» Zań jobasyn tanystyrýǵa alyp kelgen ishki ister mınıstri Q. Qasymov osyny aıtty.
Jańa zańda kópshilik is-sharalardy ótkizýge jaýapty taraptar men jergilikti bılik organdaryna qosymsha mindetter júktelmekshi. Atap aıtqanda, osyndaı sharalardy uıymdastyrýshylar memlekettik organdarǵa ótetin is-sharanyń merzimi, oǵan qatysýshylar men satylǵan bıletterdiń sany, avtoturaqtardaǵy oryndar týraly málimetterdi kúni-burtyn usynýǵa mindettelmek. Sonymen qatar, jer-jerlerde kópshilik is-sharalar ótkizetin uıymdardyń jumysyn úılestirip otyratyn uıymdastyrý komıttetteri qurylyp, mádenıet, sport salasyndaǵy keıbir tulǵalardyń mundaı sharalarǵa qatysý kezindegi quqyqtary men mindetteri keńeıtilmek. Atalǵan sala mamandarynyń qyzmetine qatysty engiziletin shekteýler de joq emes.
Mınıstrdiń aıtýynsha, halyq kóp jınalatyn sharalar ótkizý barysynda qoǵamdyq qaýipsizdikke nuqsan keltiretin nemese tótenshe jaǵdaıǵa sebep bolatyn qandaı da bir jáıtter anyqtalsa, ol is-sharalar meıli halyq ártisiniń konserti bolsyn, meıli fýtboldan ulttyq quramanyń oıyny bolsyn dereý toqtatylatyndaı tetikter osy zańda qarastyrylmaq.
Mınıstr tanystyrǵan zań jobasy boıynsha QR-y Ákimshilik quqyq buzýshylyqtar týraly kodekske, «Mádenıet týraly», «Dene mádenıeti jáne sport týraly» zańdarǵa ózgeris enedi. Atalǵan zań jobasynyń birinshi oqylymda-aq májilistiń qoldaýyna ıe bolyp, qabyldanyp ketkeni de bıliktegilerdiń bul máselede erekshe múddeleri bar ekenin ońaı ańǵartady.
Jalpy, Qazaqstanda kópshilik sharalar ótkizý burynnan ońaı jumys emes. Beıbit sherýler men mıtıńiler ótkizýdi retteıtin zańnamaǵa sáıkes uıymdastyrýshylar jergilikti ákimdikterdiń ruqsatyn almaı birde-bir saıası kópshilik shara ótkize almaıdy. Ruqsatsyz mıtıń ótkizemiz dep on bes táýlikke qamalǵan talaı saıasatkerler men qoǵamdyq belsendilerdi bilemiz. Endigi kezekte saıası sıpaty joq, mádenı-sporttyq mazmundaǵy kópshilik sharalardy ótkizýge talap kúsheımekshi. Kóptegen shetelderde ár fýtbol machy men tanymal óner juldyzdarynyń konsertteriniń sońy shýǵa ulasyp jatatynyn bilemiz. Ondaı jaǵdaılar ońǵy ýaqytta bizdiń elde de kórinis taýyp júr. Esterińizde bolsa, 2013 jyldyń 31 tamyzynda Almatydaǵy «Praım-plaza» saýda ortalyǵy aýlasyndaǵy karaoke-konserttiń sońy jappaı buzaqylyqqa ulasyp, konsertke jınalǵandar alyp saýda ortalyǵynyń shańyraǵyn ortasyna túsire jazdaǵan bolatyn. Birqatar kólik qırap, saýda nysanynyń terezeleri shaǵylǵan sol shıeleniste birneshe polısıa qyzmetkerleri men ishki ásker jaýyngerleri de jaraqat aldy degen beıresmı málimetter tarady.
Árıne, shama-sharqyna qaramaı shetelden ártis shaqyrtyp, ortalyq alańdar men stadıondarda satatyn sý-sýanyna deıin jarnamalap konsert ótkizetin saýda magnattary men baı-manaptardy táýbesine túsire alsa – bul zańnyń naǵyz halyqtyq zań bolǵany. Al, attap basqany úshin aıyp salyp, konsert tamashalaýǵa barǵan jazyqsyz stýdentterdi túrmege toǵytýdyń, eldegi bılik pen saıasatqa qatysty ózindik pikir-kózqarastary bar elshil azamattardy muqatýdyń quqyqtyq quralyna aınalsa – bıliktiń bet-berdesi ońaı ashylmaq. Olaı deýge negiz de joq emes. Kelinshegi jumystan shyǵyp qalǵan, óziniń aılyǵy qysqarǵan, mekteptegi balasy aqsha surap basy qatqan, áleýmettik qıyndyqtar ashyndyrǵan azamattardyń kóshe boıyndaǵy jaǵympazdar men jaramsaq jastar qozǵalystary ótkizip jatqan kez-kelgen «flesh-mobyńyz» ben konsertińizdi uıymdastyrýshylardyń oıyna múldem kirip shyqpaǵan basqa «konsertke» aınaldyryp jibermesine kim kepil?!
Darhan Muqan
