«Nur Otan» partıasyna degen halyq senimi kún ótken saıyn artyp keledi.
Partıanyń Almaty oblystyq fılıalyndaǵy qoǵamdyq qabyldaý bólmesine bıylǵy  9 aıda 4147 ótinish kelip túsip, onyń 1254 ıaǵnı (30,3%) oń sheshimin tapqany sol senimniń dáleli bola alady. Rasyn aıtý kerek, qarapaıym turǵyndar kez kelgen másele boıynsha ádil sheshim men qoldaýdy búginde «Nur Otan» partıasynan kútedi jáne eń sońǵy úmittiń jetegimen qabyldaý bólmesiniń esigin qaǵady.
Tekeli qalasynyń turǵyny, partıa múshesi, zeınetker Lúdmıla Mıheeva Tekeli qalalyq fılıalynyń qoǵamdyq qabyldaý bólmesine úmit arqalap kelgeni anyq. Keıýana sol kúni kestege sáıkes qabyldaý ótkizgen qala ákiminiń orynbasary Bolat Beldebekovke  kenshiler qalasyn ystyq sýmen jáne jylýmen qamtamasyz etetin «Kazsınk-TEK» JSHS keıbir  úılerde turǵyndarynyń qaryzy qalyptasýyna baılanysty qaladaǵy barlyq úılerde  ystyq sý jáne jylýmen qamtý jelileriniń ajyralytyny týraly habarlama taratqanyn baıandady. Qala ákiminiń orynbasary «Kazsınk-TEK» JSHS basshysyna dereý qońyraý shalyp, máseleni sheshti.  Iaǵnı ystyq sý jáne jylýmen qamtý jelileri óshirilmeıtin boldy.
«Qys merzimi Tekeli qalasynda sýyq ári yzǵarly. Úıdegi ystyq sý men jylýdyń turaqtylyǵy qart adamdar úshin óte mańyzdy.  Osy másele óziniń ońtaıly sheshimin tapqany úshin qalalyq fılıalǵa jáne qoǵamdyq qabyldaý ótkizip otyrǵan qala ákiminiń orynbasary B.Beldebekovke rızashylyǵymdy bildiremin», – dep alǵysyn aıtty partıa ardageri.  
Tekeli qalalyq fılıalynyń qoǵamdyq qabyldaý bólmesinde aǵymdaǵy jyldyń 9 aıynyń qortyndysy boıynsha 297 ótinish-shaǵym túsip, onyń 138-i oń sheshimin taýypty.
Eńbekshiqazaq aýdandyq fılıalynyń qoǵamdyq  qabyldaý bólmesine jas maman Dınara Qorǵash ótinishpen keldi. Tilegi – mamandyǵy boıynsha jumysqa ornalasý eken.  «Búgingi kúnniń basty máselesi, ásirese, jastar arasynda, ol – mamandyǵyna saı, laıyqty jumysqa ornalasý ekendigi jasyryn emes. Esik gýmanıtarlyq-ekonomıkalyq kolejin bitirgen meniń aldymnan da osy másele shyqty. Mamandyǵym – qazaq tili men ádebıeti pániniń muǵalimi. Barǵan jerlerim tájirıbeniń joqtyǵyn alǵa tartady. Barar jer, basar taýym qalmady», – degen jas mamannyń  ótinishiniń oryndalýyna  aýdandyq partıa fılıaly tóraǵasynyń birinshi orynbasary Qýat Baıǵodjaev yqpal etip, Dınara aýdandyq bilim bólimi arqyly Qaırat ortalaý mektebine jumysqa ornalasty. Aýdandyq partıa fılıalynyń keńesshisi Baǵdat Rahımov mamannyń jumysymen tanysý maqsatynda arnaıy bilim oshaǵyna baryp ta qaıtty. Jas maman partıa pármendiligine rızashylyǵyn bildirip, alǵysyn aıtýda.
 Kerbulaq aýdandyq fılıalynyń qoǵamdyq qabyldaýyna kelgen Saryózek aýylynyń turǵyny Kúmisqan Muhametjanova:   «Balam Tursynjan Imanıazov İ top múgedegi. Aparmaǵan jerim qalmady. Jaǵdaıymyz óte  nashar. Úkimet tarapynan qandaı da bir kómek bolar ma eken», – dep       múgedek balasyna kómek surady. Partıanyń Kerbulaq aýdandyq fılıaly tóraǵasynyń birinshi  orynbasary Jomart Bozymbekov bul  máseleni óz nazaryna alyp, aýdandyq  jumyspen qamtý  jáne áleýmettik  baǵdarlamalar bólimine  habarlasty. Aýdandyq jumyspen qamtý jáne áleýmettik  baǵdarlamalar bólimindegiler ótinishte jazylǵandardy rastady. Kúmisqan Muhametjanova jeke kómekshi retinde  aı saıyn 16 myń teńge kóleminde aqsha alatyn boldy. Osylaısha, jarty jyl boıy shapqylap, máselesin sheshe almaı júrgen ananyń ótinishi birer saǵatta qanaǵattandyryldy.  
Kerbulaq aýdandyq fılıalynyń  qoǵamdyq qabyldaý bólmesine jyl basynan beri 11 múmkindigi shekteýli azamat kelip, olardyń ótinishteriniń 75 paıyzy oń sheshimin tapty.
Almaty oblystyq fılıalynyń qoǵamdyq qabyldaý bólmesine at aryltyp jetken Sarqan aýdany, Lepsi aýylynyń turǵyny, 3 balany tárbıelep otyrǵan jalǵyzbasty ana Zámzágúl Kárimova: «Men Astana qalasyndaǵy júrip jatqan qurylystardyń birinde sylaqshy bolyp jumys istedim. Kenje  balam Tórequl Aqzerdeni medresege ornalastyryp, odan keıin Almaty qalasynda joǵarǵy oqý ornynda aqyly negizde oqyp jatqan balamnyń qasyna baryp járdemdesýdi josparlaǵanmyn. Alaıda, medresege balamdy ornalastyrý múmkin bolmaı, keri qaıtýǵa týra keldi», – dep ótinishin jetkizdi.
Ana men balany oblystyq partıa fılıaly tóraǵasynyń birinshi orynbasary Serik Muqanovtyń ózi  arnaıy qabyldap, Qaratal aýdany, Úshtóbe qalasyndaǵy №13 mektep janyndaǵy ınternatqa Tórequl Aqzerdeni ornalastyrýǵa kómek jasady. Sonymen birge   partıa belsendilerimen birlese otyryp, balanyń mektepke kerekti zattaryn jáne mektep-ınternatqa tólenetin úsh aılyq qarajatyn sheship berdi.