Iá, Astanada bolshevıkterdiń kósemi Lenınniń emes, Alashorda memleketiniń basshysy Álıhan Bókeıhannyń eskertkishi turýy tıis. Alaıda, Qazaqstan halyqtyq komýnıstik partıasy Lenınniń eskertkish «laıyqty jerge qoıýdy» ótinip, Astana qalasy ákimdigine hat jazǵan.
Naqtyraq aıtsaq atalǵan partıa «Gorkomhoz» mekemesinde qaraýsyz jatqan «Kún kósemniń» eskerkishin Astananyń qaq ortasyna qoıýdy suraıdy. Óıtkeni, «qyzyl qyrandar» «komýnıserdiń ataýly kúnderinde gúl shoǵyn qoıatyn jer tappaı» qatty qınalyp júrgen kórinedi. QHKP-nyń Astana qalalyq bólimshesiniń hatshysy Marat Áýbákirovtiń aıtýynsha, qazirgi azamattar tarıhty umytyp bara jatyr. Sondyqtan da, ol jaman jerlerde jatqan Lenınniń bústeri men eskertkishterin jınap, durystaý jerge ornalastyrý kerek dep esepteıdi. Tipti, ol qyzdy qyzdymen Lenın atyndaǵy memorıaldy keshen ashylsa deýge deıin baryp otyr. Sóıtip Áýbákirov myrza Facebook áleýmettik jelisinde Lenınniń qajetsiz jatqan eskertkishteri men bústeri týraly biletin jandardy ózderine habarlasýyn ótindi.
Ázirge Marat Áýbákirovtiń ótinishiniń qanshalyqty oryndalatyn, oryndalmaıtyny belgisiz. Bir belgilisi qyzyl komýnıser Astananyń qaq tórine kún kósemniń eskerkitkishin qoıamyz dep qulshynyp otyr. Osy rette ózderin «Alash» partıasynyń rýhanı izbasarymyz dep resmı túrde málimdegen «Aq jol» partıasy bul usynysqa ne dep jaýap beredi eken degen zańdy suraq týyndaıdy. Demek «aqjoldyqtar» komýnıserge jaýap retinde Astananyń qaq tórinde Álıhan Bókeıhannyń eskertkishin ashý týraly bastama kóterýleri kerek. Onyń ústine keler jyly Ult kóseminiń 150 jyldyq mereıtoıy.
Jalpy, osy aıtýly datanyń qurmetine Álıhan Bókeıhanovqa eskerkish ornatý isi tek «Aq jolǵa» ǵana emes, árbir partıaǵa, qala berdi árbir azamatqa syn. Alaıda, Úkimet Álıhan Bókeıhanǵa eskertkish ornatpaǵan kúnniń ózinde quramyna eldegi beldi-beldi kásipkerlerdi toptastyrǵan partıa bul máseleni óz qarajatymen sheshýi tıis dep bilemiz.
P.S. Negizi kezinde Qazaqstan halyqtyq komýnıstik partıasyna Parlament tórinen oryn berilmeýi kerek edi. Alaıda, bizdiń bılik Májiliske «Aýyl» nemese «Ádilet» syndy partıany jiberýdiń ornyna, halqymyzdy qynadaı qyrǵan komýnıstik partıasyn jiberdi. Bul árıne bizdiń bılikte ulttyq ustanymnyń joq ekendigin taǵy bir dáleldese kerek.
Serik JOLDASBAI
Astana
