Qytaıdyń komýnıstik partıasy beısenbi kúni "bir otbasyǵa - bir bala" saıasatyn toqtatý týraly sheshim shyǵardy. Budan bylaı ár qytaı otbasy eki bala ósire alady. Bul týraly «Qamshy» portaly Azattyq radıosyna silteme jasap habarlaıdy.

"Sınhýa" agenttigi taratqan habarǵa sáıkes, ondaǵan jylǵa sozylǵan Qytaıdaǵy "bir bala saıasaty" joıylmaqshy. Qytaıdyń komýnıstik partıasy eldegi barlyq erli-zaıyptyǵa endigári eki baladan ósirýge ruqsat berdi.

Buǵan deıin 2013 jyly Qytaı úkimeti "bir bala saıasatyn" ońaılatyp, mıllıondaǵan otbasyǵa arnaıy shartpen eki bala ósirýge múmkindik jasaǵan. 1979 jyly qabyldanǵan "bir bala saıasatyn" qoldaný arqyly Qytaı bıligi halyq sanynyń tez ósýin baıaýlatpaqshy bolǵan. Biraq bul saıasattyń sońy el turǵyndarynyń ishinde qart adamdardyń úles salmaǵynyń artýyna soqtyrǵan.