Jol toryp, ótken-ketken júrgizýshilerdi bopsalaǵan eki polıseı beısenbi kúni jemqorlyqqa qarsy qyzmettiń quryǵyna ilindi. Tekserý barysynda olardyń bir kúndik zańsyz tabysy 500 myń teńge ekeni anyqtaldy. Bul týraly «Qamshy» portaly memlekettik qyzmet isteri jáne jemqorlyqqa qarsy is-qımyl Agenttiginiń Jambyl oblystyq departamentine silteme jasaı otyryp habarlaıdy.
29 tamyz kúni memlekettik qyzmet isteri jáne jemqorlyqqa qarsy is-qımyl qyzmetiniń jambyldyq departamentine bir azamat ákimshilik jaýapkershilikke tartpaý úshin polıseıler ózinen 40 myń teńge aqsha bopsalap jatqanyn aıtyp shaǵymdanǵan. Eki qolyn ysqylap daıyn otyrǵan jemqorlyqpen kúreskerler bul iske dereý aralasyp, kúdikti polıseılerdi ustaýdyń qamyna kirisedi. Sol kúni, jol-patrýldik polısıanyń aǵa serjant jáne serjant shenindegi 2 qyzmetkeri Húndaı markaly avtokólik bazasynda jasalǵan «Avtoýragan» arnaıy kóliginiń salonynda 30 myń teńge kóleminde para alyp jatqan jerinde qolǵa tústi.
Alaıda, qos polıseı de qýlyq-sumdyqtan qur alaqan emes eken. Ońaılyqpen berispegen. Ustaý kezinde belsendi túrde qarsylyq kórsetip, arnaıy mashınamen oqıǵa ornynan taıyp turǵan. Sóıtip, Taraz kóshesinde ádette qylmyskerlerdiń izine túsýi tıis polısıa kóligi ózi qashyp bara jatqan kórinis bylaıǵy jurttyń tańdaıyn qaqqyzdy. Kólikti tizgindegen polıseı qatty sasqalaqtasa kerek, birazdan soń rólge ıe bola almaı jol jıegindegi aryqqa túsip ketken. Toqtap qalǵan arnaıy kólikten polıseıdiń bireýi sekirip túsip, jol boıynda jaıbaraqat turǵan «Mersedes» markaly kóliktiń júrgizýshisine tapansha kezegen. Sóıtip, «polısıa qýý» operasıasy jeke menshik kóliktiń qatysýymen jalǵasyn tapqan. Alaıda, kóp uzamaı qos polıseı de qolǵa tústi. Sóıtse, ekinshi polıseı bekerge ala shapqyn bolmapty. Qaltasynan tintý kezinde sońǵy alǵan 30 myńnan basqa 200 myń teńgeden astam aqsha, qyrǵyz somy, orys rýbli, tipti eýronyń birneshe kýpúrasy, birneshe adamnyń, onyń ishinde Qyrǵyz Respýblıkasy azamattarynyń qujattary tárkilengen. Ustalǵan polıseı bul aqshalardyń barlyǵy ózimniń jeke qarajatym dep aqtalǵan. Qazir olar tergeý abaqtysyna jabylyp, ústilerinen qylmystyq is qozǵalǵan.
